Euskaraldirako hamaikakoa joko zelaira

Asteazkenean da aurkezpena, 18:00etan, Donibaneko kulturguneko Juanba Berasategia aretoan; ekitaldi irekia da eta herritarren parte hartzea errazteko garraio zerbitzu berezia antolatu dute.

olatz mitxelena

Pasaia

2018/09/06

Nexgraff-ek Euskaraldirako sortutako grafitiaren zati bat, San Pedron, Itsas Eskolaren horman.

Udako oporrak bukatu dira gehienentzat eta ikasturte berriaren atarian, Euskaraldirako prestaketa lanak atzerako kontaketan hasiak dira. Pasaian datorren astean aurkeztuko dute Euskaraldirako hamaikakoa, antolatzaileek azaldu dutenez, “euskararen aktibazioa bultzatzeko urratsa eman duten 11 pertsonek osatuta”. Ekimenaren enbaxadoreak izango dira Pasaiako lau barrutietan. Aurkezpen ekitaldia Donibaneko Juanba Berasategi aretoan izango da, asteazkenean (hilak 12) 18:00etan. Euskararen Aholku Batzordeak azaldu duenez, “ekitaldi dinamikoa” izango da, “alaia”, herriko aktoreen laguntzaz herritarrei Euskaraldia zer den eta nola gauzatuko den azaltzeko. Garraio eta haurtzaindegi zerbitzuak

Herritarrak ekitaldira bertaratzea nahi du Euskararen Aholku Batzordeak, eta parte hartzea errazteko garraio berezia antolatu dutela iragarri dute. Zehaztu dutenez, 17:30ean Trintxerpeko hospitalillo moilatik eta San Pedroko ontziralekutik itsasontzi bana abiatuko dira Donibaneko kulturgune ondoko moilara. Horrez gain, Pasai Antxotik ordu berean autobusa antolatu dute Marea Altako geltokitik Donibaneko kulturgunera joateko. Ekitaldiaren ondoren luncha egongo da eta bueltako garraio zerbitzua 19:30ean izango da. Haurrekin etorriz gero, haurtzaindegi zerbitzua izateko aukera egongo da Ubera liburutegian. Horretarako, jakinarazi pasaia@euskaraldia.eus helbide elektronikora edo 688695520 telefono zenbakira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.