Aniztasuna zentzu zabalean ulertzen eta hedatzen jardun da Bizipoza Errenterian. Jaialdia antolatu dute hilaren 29rako.
Bizipoza jaia aurkeztu zuten atzo. Bertan Elkarte desberdinetako kideak eta alkatea
Aniztasuna zentzu zabalean ulertzen eta hedatzen jardun da
Bizipoza Errenterian.
Juneren Hegoak eta
Mindara elkarteekin batera, guztiontzako behar lukeen mundu baten alde egiten dute lan. Jaialdia antolatu dute hilaren 29rako.
Bizipoza elkarteen elkartea. Hala esan du Juneren Hegoak elkarteko Maite Gartzia ordezkariak. Izaera bereziko gaiak jorratzen dituzte zailtasun sozialak dituzten familiei laguntzeko eta errealitate desberdinak gizarteratzeko. Aipaturiko elkartearen helburua laguntza sare bat osatzea da, esaterako, seme-alaben gaixotasun edo heriotzek sorturiko zailtasunei aurre egiteko asmoz. Mindara elkarteak, ordea, aniztasun funtzionala lantzen du gehienbat eta helburua pertsona horien autonomia sustatu, gizarte, gorputz kirol eta jarduera osasungarriak bultzatzea da.
Elkarte horietako ordezkariek hartu zuten hitza atzo arratsaldean emandako prentsaurrekoan. Bizipoza elkartean parte hartzeak hasieran bertigoa ematen ziela aitortu zuten, baina sentimendu guzti hori ilusioan bihurtu dela ere azpimarratu zuten. Eran berean, Udalak eman dituen erraztasun eta laguntzak eskertu nahi izan zituzten: ekonomikoak eta teknikoak. Bertan egon zen ere Julen Mendoza Alkatea: “Haurrentzat garrantzitsua da aniztasuna zentzu zabalean ulertzea”.
Baloreen jaia
Hala nola, irailaren 29ko jaia aurkezteko egin zuten prentsaurrekoa. Bertan 33 elkartek parte hartuko dutela aurreratu zuten. “33 errealitate desberdin gizarteratzen saiatuko gara, umorea eta jolasa aratz hartuta”, esan zuen Leire Elizegi Bizipozaren izenean. Irrien Lagunak taldeko pertsonaiak arituko dira egunean zehar hainbat jolas dinamizatzen, gero haurrek, elkarteetara iritsi eta haien errealitatea ezagutzeko.
Hiru gune egongo dira: irria, tximeleta eta elkartasuna izena jarri diotenak. Lehenengoan ikuskizunak egongo dira, Irrien Lagunak edo Goazen! bezalakoak. Bigarrenean, tailerrak eta dinamikoagoak diren ekintzak. Eta hirugarrena 33 elkarteen informazio eta ezagutza gunea izango da. Egun guztiko egitarua antolatu dute eta tartean bazkaria. Txartelak interneten egoteaz gain eskuragarri daude Xenpelar Kultur Gunean, Arkaitza tabernan edo Kerala tabernan. Pirritx, Porrotx eta Marimototsen ikuskizunerako sarrerak ere salgai daudela aurreratu dute. Beste guztia doakoa izango da: kantua, dantza, txokolatea, palmak eta kajoiak jotzeko aukera, tailerrak, puzgarriak eta beste hainbeste ekitaldi. Egitarau osoa
hemen ikusgai.
