Bonolotoak 2,2 milioi euro ekarri ditu Errenteria-Oreretara

Kapitain Enea kaleko 15. zenbakiko loteria salmenta dendan zigilatu dute txartela. Aurretik, sari asko emandakoa da saltoki hori.

Urko Etxebeste

Errenteria-Orereta

2018/09/19

Bea Etxenike, pozik gaur goizean loteria saltokian.

Atzoko Bonolotoaren zozketak 2.213.050,85 euro utzi ditu Errenteria-Oreretan. Zehazki, Kapitain Enea kaleko 15. zenbakiko administrazioan Bonolotoaren txartel bat egin zuenak lehen mailako saria lortu du, sei zenbakiak asmatu dituelako. Bea Etxenike saltokiaren arduradunak HITZAri administrazioa ireki bezain pronto esan dionez, ezin jakin nor den irabazlea, ezta txartela pertsona batena edo talde batena den. Hori bai, bai Etxenike, bai eta asmatzailea, arras pozik egoteko moduan daude. 27 urte daramatza lanean loterien salmentan Etxenikek. Ez da lehen aldia sari potoloa ematen dutela; azkena, Gabonetako loterian eman zuten. Hortaz, badute esperientzia saltoki horretan dirutza ematen, “ia urtero ematen dugu zerbait”, adierazi du. Onartu du, sariak eman eta gero jende gehiago datorrela bertan txartelak egin edo loteria erostera, “bi asteko gauza izaten da. Gero dena lasaitzen da, betikora itzultzen gara”. Pozik. Oso pozik dago Bea Etxenike. Gustuko du sariak ematea. Atzo gauean bertan hots egin zioten Donostiako delegaziotik saria eman zutela. Eta gaur jada, denda ireki eta berehala, telefono deiak jasotzen hasi da zorion mezuak jasotzeko. Etxenikek desio du sariduna errenteriarra izatea, “eta nahiko nuke dirua behar duen norbait izatea onuraduna. Oso polita da hau”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.