Berritasunak San Fermin Txikien egitarauan
Ekitaldi berriak iragarri ditu jai batzordeak, baita pare bat ordutegi aldaketa ere.
Gaur arratsaldean hasiko dira Antxoko San Fermin Txikiak, hiru txapelketekin: toka, bote eta patata tortilla lehiaketa. Txupinazoaren atarikoak izango dira. Jaiei hasiera emango dien suziria, berriz, zumardian botako dute, 20:00etan, eta ez 19:30ean aurrez iragarri bezala. Gaurko herri danborrada 21:00etan irtengo da eta afaria eta ondorengo bingo musikatu feminista 22:00etarako iragarri dute.
Biharko egitarauan ere badira berritasunak. Goizean, Topaguneak antolatuta, aurtengo sanferminetan lehenbizikoz Antxora etorritako Maliñomariren etxera bisitatzera joateko irteera antolatu dute. 11:00etan abiatuko dira zumarditik, familia giroan. Musika, dantza, ipuinak, tailerrak eta hamaiketakoa izango dira aukeran.
Eta hortik aurrera, hamaika aukera: herriz bazkaria, itzal taldearen kontzertua, antxotribiala, arrantza txapelketa.. eta gauean, festa biribiltzeko, Burrunba taldearen kontzertua eta DJ Karlosen erritmo dantzagarriak.
Igandeko egitarauan ere bada aldaketa txiki bat. Hasieran pintxo lehiaketa izango zena, azkenean piper bete lehiaketa izango da, 11:00etan. Piperrak jai batzordeak banatuko ditu, eta parte hartzaileek betegarria eta saltsa ondu beharko dute. Sei piper prestatu beharko dituzte parte hartzen duten kuadrillek.
Egitaraua
