Urrezko hiru puntu zuri-gorrientzat
Pasaia, etxean jokatutako partidan, sendo defentsan eta lehiakor erasoan.
3. Maila estreinatu berri, latza ari da izaten denboraldiaren hasiera zuri-gorrientzat, baina jardunaldiak aurrera egin ahala, zuri-gorrien lanak fruituak ematen hasia da. San Ignacioren kontrako partida irabazi dute asteburuan, partida oso lehiatuan, lan fina burututa.
Lehen zatiaren hamargarren minutuan aurreratu ziren zuri-gorriak, talde jokaldi eder baten ondoren, Alberto Nagorek gola sartuta. Jarraian etorri ziren Gasteiztarren erasoak, baina Pasaia sendo aritu zen defentsan eta Iker fin atepean. Horri eskerrak abantailarekin iritsi ziren atsedenaldira.
Ildo beretik partidaren bigarren zatia. Pasaia zelaian txukun jarrita, eta kontrarioak nahi eta ezin, 68. minutuan Mikel Egiluzek maisuki ateratako falta baten ondorioz, zuri-gorrien bigarrena iritsi zen arte. Igor Gomezek sartu zuen bigarren gola.
Honenbestez, Pasaiak denboraldiko bigarren garaipena lortu du, eta sailkapenaren erdialdean kokatu da, hamaikagarren postuan, sufrituta, baina ederki merezita.
Azken hiru puntuen bultzadaz, ezin motibatuago zelairatuko dira datorren astean Basaurin, Basconiaren kontrako partida jokatzera.
Azken partidarentzako baloia Ibañez Tailer Mekanikoak eman du eta zelaian egindako zozketan sarituko zenbakia 921 izan da.
