Albaolan, itsaso bat bete elkartasun
Tenpora taldearen kontzertu solidarioak 3000tik gora euro bildu ditu Salvamento Maritimo Humanitario GKErentzat.
245 lagunek gozatu zuten Tenporaren kontzertuaz Albaolaren Kultur Faktorian.
Emanaldian, guztira, 245 lagun bildu ziren, Kultur Faktoriaren edukiera lepo. Baina kontzertuaz gozatu gabe ere egon da ekarpen ekonomikoa egin nahi izan duen jendea. Guztira, 3245 euro bildu dituzte SMH GKEarentzat.
Albaola Elkarteak eta Orona Fundazioak sustatutako kontzertua izan da, bien arteko harremanaren bosgarren urteurrena ospatzeko antolatuta. Orona Fundazioko Garapen Zuzendaria Iñigo Marquetek, SMHko presidente Iñigo Mijangosek eta Albaola elkarteko komunikazio arduradun Enara Novillok eskerrak eman zizkieten kontzertura bildutakoei eta kontzertua egitea posible egin duten laguntzaile guztiei. Halaber, “halako ekitaldien beharra” nabarmendu eta “mediterraneoan gertatzen ari denaren aurrean erantzun beharraz” ohartarazi zuten.
Tenporak Mundu Berria eta Itzulika, bere bi lanetako abestiak eskaini zituen, eta kantek harrera beroa izan zuten publiko artean.
Kontzertua bukatuta Diametro 200 Slow kafetegiaren eskutik ekarritako produktuak dastatu ahal izan ziren Albaolan, jaki guztiak inguruko ekoizleen produktuz osatuta, eta edariak ere bertako ekoizleen eskutik eskaini zituzten. Petritegi eta Lizeaga sagardotegiek eskaini zuten sagardoa eta Txakoli Aizpuruak txakolina.
