Inoiz izan den Atlantikaldiarik jendetsuena izan da aurtengoa. 31.500 bisitari gerturatu dira Errenteriara, duela bi urte baino %10 gehiago.
Collar, Goddi eta Tolosa Atlantikaldiaren balorazioa egiteko agerraldian gaur.
Handia. Hitz bakarrarekin definitu daiteke
Atlantikaldiaren bosgarren edizioa. Gaur egin dute lehen balorazioa Ion Collar Kultura Zinegotziak, Iker Tolosa jaialdiaren zuzendariak, eta Samira Goddi Komunitate Bizikidetza eta lankidetza teknikariak. Ase azaldu dira hirurak, jaialdiarekin aurten zituzten erronkak bete eta gainditu ere egin dituzten sentsazioarekin, eta datozen ekinaldietarako muga oso goian jarrita duten jakitun.
Oso pozik azaldu da Tolosa gaur eguerdian egin duten agerraldian jaialdiak eman duenarekin. Ez bakarrik horrekin, ordea, jendearen parte hartzea ere oso positiboa izan dela esan du , izan ere, inoiz izan den Atlantikaldiarik jendetsuena izan da aurtengoa. Horretarako duela bi urteko Atlantikaldian egin antzera, herriko plaza eta Zumardia lotzen diren puntuan pertsona zenbatzailea jarri dute, eta horrek eman ditu datuak: “2016ko Atlantikaldiarekin alderatuta, %10eko igoera izan du jaialdiak”. Zenbakietara eramanda, 31.500 bisitari zenbatu dituzte (2016an, 28.500 izan ziren).
Kantitateak badu garrantzia zalantzarik ez da, baina horren gainetik jarri du Tolosak kalitatea. izan ere, Atlantikaldiaren egitarauak, musika eskaintza zein antolatutako beste jardueren kalitatea gorena izan da aurten ere, Esne Beltza, Nneka edo Beberen kontzertu nagusiak hartu zituen Agirre Lehendakariaren plazako Itsas Argi Nagusia goraino bete zuten, baina ekintza guztiek bete zutela plaza nabarmendu du jaialdiaren zuzendariak, “Herriko plazako formatu txikiagoko kontzertu eta dantza ikuskizunek, herrixkan familiarteko publikoari zuzendutako proposamenek, kale Kaian gazteei zuzendutako egitarauak… Kalitatezko egitaraua osatu dugu diziplina guztietan, eta publikoak saritu egin du hori”.
Jaialdiaren arrakasta ulertzeko gako bat jaialdiaren kalitatea da, baina ez da ordea, bakarra, eta Collarrek eman du arrakastaren beste giltzarrietako bat, “eragileen inplikazioa”. “Aparta” halakoa omen da, eta ezinbestekoa, gainera, “guztien lanari esker osatu ahal izan dugu maila goreneko egitaraua. Egitarauan ekarpena egin dute, baina jaialdian ere hartu dute parte”, erantsi du Collarrek.
Herritarren arteko topaleku, eta elkar ezagutzeko molde berria dela Atlantikaldia esan du bestalde Goddik, “jaialdi formatu berri bat eraiki dugu, guztiontzako den jaialdia”. 80 komunitate ezberdin bizi dira elkarrekin Errenteria-Oreretan, eta horiek guztiak espazioak konpartitzen ikustea “pozgarria” dela esan du Goddik, “Atlantikaldia beraien jaia ere egin dute komunitate horiek”. Kulturen arteko bizikidetzan oinarritutako ekintzek izan duten arrakasta ere nabarmendu du Goddik, eta Sukaldian iniziatibari erreparatu dio, “berrikuntzak izan ditu eta horiei esker, elkarte solidario bat babesteko aukera izan du Atlantikaldiak. Tailerretan prestatutako errezetak Gastro gunera eraman ditugu herritar guztiek munduko gastronomia dastatzeko aukera izan zezaten. Plater horiek euro baten truke eros zitezkeen eta jasotako dirua, berriz, Zaporeak elkartearentzat izan da”.
Etorkizunari begira jarri da amaitzeko Tolosa, eta muga oso goian jarrita dutela aitortuta Atlantikaldiaren filosofia jaialditik harago, urte osoan egiten diren ekintzetan zabaltzeko lanean jarraituko dutela esan du, “gainera, beste erakundeekin lankidetzarako ateak zabaltzen jarraitu nahi dugu eta bide hori garatu”.
