Mukuru, edo musika bizitzeko modu bat

Mukuru kolektiboak aurkezpen jaialdia egingo du. Musika bizitzeko era bat konpartitzen duten Euskal herriko musika talde eta bakarlariek osatzen dute kolektiboa.

Ikerne Zarate Gartziarena

Errenteria-Orereta

2018/10/02

Muskulo errenteriarrak kontzertuan arituko dira.

Mukuru kolektiboak aurkezpen jaia egingo du hilaren 13an Errenteria-Oreretan. “Euskal herrialdetako” herri ezberdinetako musika talde eta bakarlariek osatzen dute Mukuru kolektiboa, “Gipuzkoa, Nafarroa eta baita, zoritxarrez, hainbatetan hegoaldean hain gutxi kontuan hartzen ditugun iparraldeko taldeak ere”. Konplizitate eta miresmenak daude kolektibo horren oinarrian, eta esperientziak konpartitzeko gogoa, elkar elikatu eta elkarrengandik ikastea dute helburu, azaldu dutenez: Norberaren musika sortu, grabatu edo zabaltzeko prozesuan egon daitezkeen aukerak hobe ezagutu eta gauzatzeko. Finean, lagunekin beti delako hobea”. Musika bizitzeko modu bat dute kolektiboa osatzen duten kideek, eta gizarteratzeko unea heldu zaie orain, Mukuru jendaurrera eramateko momentua, eta horri begira, egun osoko egitaraua atondu dute. Hilaren 13an izango da aurkezpen jaialdia, larunbatarekin, eta goizez 11:00etan hasita Musika, zergatik kolektiboki kolektiboan mahai ingurua egingo dute Bidehuts eta Erraiak musika zigiluek, Musikazuzenean kontzertuen atari digitalak, eta Taupaka sortzaileen elkarteak. Arratsaldez kontzertuen txanda helduko da Mikelazulon bertan, 18:00etatik aurrera. Errenteriako Nigara Zuek taldea, Ainiza Monjoloseko Paxkal Irigoyen, Donibane Garazio Seitan taldea, Urretxuko Isuo ta Kezman, Usurbilgo Peru Galbete, Elizondoko Iturria eta Errenteriako Hatxe arituko dira. Musika eskaintza ez da horretara mugatuko eta gauen, Niessen kulturguneak hartuko du Mukuru Kolektiboaren aurkezpen jaialdiaren lekukoa. Bertan Urretxuko Txost taldea, Antzuolako Klak!son eta Errenteriako Muskulo izango dira oholtza gainean. Azken kontzertu horretarako sarrerek 5 euro balio dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.