Derbia, Lezokoa, jokatuko dute gaur areto futboleko Gaintxu AFTk eta Jaixki AFTk. Bekoerrota kiroldegiko harmailetan giro ona espero da.
Jaixkiren eta Gaintxuren armarriak gaur elkartuko dira Bekoerrotan.
Lezoko areto futbolaren historian lehen aldiz, Gipuzkoako Lehen Mailan herriko bi taldek elkarren kontra jokatuko dute. Gaur da partida, 21:50an Bekoerrota kiroldegian. Aurrez aurre Gaintxu AFT igo berria, eta Jaixki AFT kategorian eskarmentua duen taldea. Euskal Herriko hamaikako futboleko bi talde nagusiek barka dezatela, baina gaurko derbia Lezokoa da.
Biak dira etxeko, baina markagailuaren ezkerraldeko laukia Gaintxu AFTrena izango da. Hau da, eurek jasoko dute Jaixki AFTren bisita. Bitxia egoera. Partida guztietan etxeko bat eta kanpoko bat izan behar, baina kasu honetan, bereizketa hori ia hutsala da. Harmailetan, puntuak jokoan dituztela, lehen aldiz bilduko dira bi taldeen zaleak. Izango dira bufandaren bi aldeak, talde bakoitzaren koloreekin soinean eramango dutenak (horrelako bufandak baleude, bai). Hortaz, zale konpartituak, ‘nik talde bakarra daukat’ dioten horietakoak, denak ez dira izango gaur Bekoerrotan.
Gipuzkoako Lehen Mailako bigarren jardunaldiko lehia da gaurkoa. Bigarren itzuliko partida, beraz, fase horren hasieran izango da. Hau da, herriko bi taldeen arteko
lehia fratrizidarik ez da izango, puntu premiak liga bukaerarako izango baitira. Baina bai gaur eta itzulikoan, ziur, partida politak, intentsuak, jokatuko dituztela bi taldeek.
Edonola ere, egun, bi taldeak puntu banarekin daude berdinduta sailkapen nagusian, aurreko asteburuan Jaixkik bina egin zuelako etxean Anoetaren kontra, eta Gaintxuk hirunakoa lortu zuelako Eskoriatzaren etxean.
Eskubaloia, abian
Futboleko eta areto futboleko ligak hasita, asteburuan Gipuzkoako eskubaloia martxan jarriko da. Hartara, Munttarperen bi taldeek lehen golak bihar sartuko dituzte, etxean gainera. Gizonen taldeak 16:00etan jasoko du Soraluze-Bergara taldea, Gipuzkoako Lehen Mailako estreinako partida historikoan. Emakumeen taldeak, Gipuzkoako Ligakoak, jarraian jokatuko du bihar (18:00etan), Corazonistasen kontra
Jarraian, Lezoko kirol talde nagusien kartelera:
FUTBOLA
Gizonen Erregional Ohorezko Maila
- Allerru-Elgoibar, bihar (larunbata) 16:00etan Plazetan.
Emakumeen Gorengo Maila
- Santo Tomas Lizeoa-Allerru, etzi (igandea) 10:00etan Donostiako Puioko zelaian.
Gizonen Gazteen Ohorezko Maila
- Allerru-Trintxerpe, bihar (larunbata) 11:30ean Plazetan.
Gizonen Gazteen Lehen Maila
- Allerru-Orereta Kafea, bihar (larunbata) 18:00etan Plazetan.
ESKUBALOIA
Emakumeen Gipuzkoako Liga
- Munttarpe-Corazonistas, bihar (larunbata) 18:00etan Bekoerrotan.
Gizonen Gipuzkoako Lehen Maila
- Munttarpe-Soraluze Bergara, bihar (larunbata) 16:00etan Bekoerrotan.
ARETO FUTBOLA
Gizonen Gipuzkoako Lehen Maila
- Gaintxu AFT-Jaixki AFT, gaur (ostirala) 21:50an Bekoerrotan.
SASKIBALOIA
Gizonen Gipuzkoako Hirugarren Maila
- Kurkubik Aloña Mendiren kantxan hasiko du sasoia urriaren 21eko asteburuan.
