"Guztiontzako" jaialdi izan behar duela eta auzoetara heldu behar duela ere esan du alderdi sozialistak.
Duo B.A.V.I bikote brasildarraren kontzertuak publiko handia izan zuen
Positiboki. Horrela baloratu du alderdi sozialistak Errenteriako Udalak antolatu duen Atlantikaldiaren bosgarren ekinaldia, baina kudeaketa hobetu daitekeela gaineratuta. Bisitari kopuruari erreparatu dio, balorazio positibo hori egiteko, “baina aztertu beharreko itzal garrantzitsuak ere izan ditu, hausnartu beharreko arloa jaialdia hobetzeko”.
Atlantikaldia egiteko aukeratutako datek Donostiako Zinemaldiarekin bat egin dutelako kexu azaldu da Jose Angel Rodriguez alderdi sozialistaren bozeramailea, “horrek bisitari gehiago biltzea zaildu du. Horren harira, aurten berriz ere proposatuko dugu datak aldatzea. Atlantikaldia igande eguerdian amaitzen da, arratsaldea galtzen da, eta tarte horretan familiek aisialdirako aukera izaten dute. Astelehenetako azoka txikia bada arazoa, herrian espazio gehiago dago antolatutako ekintzak luzatu eta auzoetara heltzeko”.
Atlantikaldia Zumardian zentralizatzeagatik bizilagun eta ostalarien kexak jaso dituela alderdi sozialistak gaineratu du Rodriguezek, eta jaialdia “deszentralizatzea” eskatu du. Zumardian jaialdian zehar jarritako foodtruckaren gaineko iritzia ere eman du PSE-EEk: “Horien presentzia sustatu beharrean, herriko saltokiek eta ostalaritzak betetzea tarte hori zentzuzkoagoa litzateke”.
Hondakinak biltzeko eremuak “exkaxak” izan direla ere esan du eta “informaziorako puntu morearen” falta nabarmendu du jaialdian zehar.
Finantza baliabide eta babesle gehiago lortu beharko litzakeen uste du bestalde, “82.000 kostatzen den enpresa antolatzailea izanda egokia litzateke babesle eta bitarte gehiago lortzea jaialdia kostatzen den 350.000 euroak udalak bere gain hartu behar ez izateko ia osotasunean. Hemen ez da ikusten munizipalizazioaren aldeko apustuarekiko koherentziarik”.
Amaitzeko eskertu egin du Rodriguezek, jaialdia egiteko lagundu duen jende guztiaren jarrera, baita publikoarena “errespetuz eta tolerantziaz aritu direlako”.
