Euskaraldia euskararen erabilera areagotzeko ariketa kolektiboaren gaineko azalpenak eman zituzten atzo Gezala Auditoriumean egin zen ekitaldian.
Atzoko aurkezpenean bildu zirenak.
Atzo aurkeztu zuten Gezala Auditoriumean zertan den Lezoko Euskaraldia. Ekitaldi jendetsuan —Orratx! antzerki taldeko kideek umore ukitua eman zioten—, azaroaren 23tik abenduaren 3ra egingo den euskararen erabileraren aldeko ariketa kolektiboaren berri eman zuten, azalpen orokorrekin —zer den Euskaraldia, zer diren Ahobizi eta Belarriprestak— eta zehatzekin: Lezon Euskaraldiaren partaide izateko zer, non eta noiz egin behar den azaldu zuten.
Informazioa esku artean izanda, orain, Euskaraldian izena emateko garaia iritsi da.
Izena emateko aukera hauek daudela jakinarazi zuten, hilaren 8an hasita:
- Euskara Zerbitzuan (Donibane kalean dago): astelehenetik ostiralera, 08:00etatik 14:00etara.
- Oroitzene AEK euskaltegian: astelehenetik ostegunera, 16:30etik 19:00etara.
- Donibane kaleko Kultura Aretoan: astearteetan, 17:30etik 19:30era.
- Internetez: Euskaraldiaren webgunean.
