Proisak, egoerarekin "nazkatuta", batzarrera deitu ditu herritarrak

"Udalaren erantzukizun eza" salatuz, komunikatua plazaratu dute, eta herritarrak batzarrera deitu dituzte, astelehenerako, 19:30ean, Ertin.

olatz mitxelena

Pasaia

2018/10/05

San Pedroko Proisa egitasmoko kideen familia argazkia, egin zuten azken agerraldi jendetsuan.

“Nazkatu gara”. Hala dio Proisaren komunikatuak izenburuan, letra larriz. Pazientzia agortu zaie San Pedron Proisaren proiektua bultzatzeko lanean ari direnei, eta “udalaren erantzukizun eza” salatzeko komunikatua plazaratu dute. Egungo egoeraren berri eman, eta batzarrera deitu dituzte herritarrak, astelehenerako, “Proisa guztiona denez, guztien artean erabakitzeko zer egin”. 19:30ean elkartuko dira, Ertin. Komunikatuan hiru salaketa egin ditu Proisaren aldeko mugimenduak. Lehenengoak aurtengo aurrekontu parte-hartzaileen egitasmoarekin du zerikusia. Prozesu hartan erabaki zenez, aurten Proisako orubean behin behineko eraikin bat altxa behar dute, Proisa Gune Soziokulturala aurrera eramateko. Urtea aurrera doa eta udalak bide horretan inongo urratsik ez egin izana salatu du Proisak: “Urrian gaude eta udalak ez du inongo pausorik eman bide horretan. Ezerez. Zero”. Bigarren salaketa Ertirekin du zerikusia, udal aretoarekin. Kulturgune berria eraiki bitartean Ertin egiten ditu Proisak jarduera asko eta asko: han atondua dute Haur eta Familien Txokoa eta bertan ere bai beraiek “Egongela” deitzen dutena, hitzaldi, proiekzio, eta antzekoetarako. Bada, udalak bi espazioak hilaren 15erako uzteko agindua eman diela jakinarazi dute. “Ertin, bizilagunen kudeaketaren bitartez, guztiona den eta guztiontzako espazio bizia sortzen ari gara. Hiru urte daramagu bide honetan”, nabarmendu dute, eta gogor gaitzetsi duteespazio husteko agindua eman izana beste alternatibarik eskaini gabe. Hirugarren eta azken salaketak 2017. urtean udalarekin eta aldundiarekin sinatutako hitzarmenari eragiten dio erreferentzia. Proisaren arabera, udalak ez ditu bete orduan hartutako konpromisoak, Proisak, bere aldetik, konpromiso guztiak bete dituen bitartean. Komunikatua

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.