[Bideoa] Antxo, barrez lehertzen
Antxo da asteburu honetan Pasaiako 37. Antzerki Jardunaldien epizentroa. Atzoko saioek arrakasta berezia izan zuten, kalekoak eta aretokoak.
Pasaiako Umorezko Antzerki Jardunaldien 37. edizioa ekuatorera iritsi da asteburu honetan. Fokua Antxon dago jarrita. Atzo (ostirala) dantza ganberroarekin eta antzerki satiradunarekin gozatzeko aukera izan zuten antxotarrek. Aurreko asteburuan Donibanen bezala, jendeak era ezin hobean erantzun egin zien emanaldi guztiei. Ilunabarrean egin zuen Tio Teronen Semeak dantza talde multidiziplinarrak Freshcool ikuskizuna Zumardian. Ez zuten inor ere geldirik utzi. Batetik, euren arteko giroak asko transmititzen duelako, eta bestetik, giroaz gain, ikuskizun hori bere osotasunean sentsazioak, txantxa girokoak gehienbat, ateratzeko prestatua dagoelako. Eta lortu zuten Oarsoaldeko dantzari asko biltzen dituen taldeak. Publikoa pozarren, energia gorakadarekin. Gustura. Ikus beheko bideoan saioaren une gogoangarrienetako bat. Horren ondoren, Antxoko Topagunearen ekimenez, Kultur Etxean afaria egin zen, jendez lepo hura ere. Izan ere, Pasaian epizentro duen Hamaika Buelta antzerki taldeak Mila ezker lana taularatu zuen. Ezkerrekoa, abertzalea, eta militantzia politiko eredu baten satira dibertigarri bezain ozpindua egin zuten lan horrekin, reality show batean oinarritutako mamiari jarraituz. Gaur eta bihar Antxon jarraituko dute gau eta bihar Antzerki Jardunaldiek. Goizez, Joserra Fachado aktore sanpedrotarra klown ikastaroa egiten ari da Kultur Etxean. 21:00etan, herri afaria eta KaparetAntxo Kultur Etxean ere. Bihar (iganda), berriz, 19:00etan, Abandonate mucho lana taularatuko du Las XI konpainiak Kultur Etxean. Gozatu umorezko antzerkiaz. Lotutako informazioa: