Gobernu taldearen proposamena hobetzearren aurkeztu duela bere proposamena esan du EAJk eta "herritarren defentsan".
EAJko hiru zinegotziak martxoko plenoan.
Errenteriako Gobernu Taldeak hilabete hasieran aurkeztutako
ordenantza fiskalen proposamenean hainbat hobari ezartzea eskatu du. Salbuespen batzuekin, tasak eta zergak izoztea proposatu du gobernu taldeak 2019ko ordenantza fiskaletan. Igoerak lau zerga eta tasatan planteatu dituzte, eta %1ekoak izango dira, azaldu zutenez, hainbat zerbitzuk sortzen duten defizitari erantzuteko.
EAJ-hainbat hobari eskatu ditu bere proposamenean, gobernu taldeak ordenantzak izoztea proposatzen badu ere, oro har, %1a igotzea proposatzen duen zerga eta tasak direlako bere iritziz herritarrengan eragin gehien izaten dutenak: “Hobari horiekin, zailtasun ekonomiko handienak dituztenengan %1eko igoeraren eragina gutxitzea edota ingurumenaren zaintza sustatzea dugu helburu”.
Zailtasun ekonomikoak dituzten herritarrentzako hobariak proposatu ditu batetik EAJk eta horren harira hondakinen bilketaren tasa aipatu du: “Orain bi urte %21eko igoera izan zuen, eta joan den urtean %2koa. Hondakinen tasa hori eta ur eta estolderiarena ere %1 igotzea proposatu du udal gobernuak, eta gure ustez egoera larrienean daudenengan eragina gero eta handiagoa da”. Bi tasa horietan, bizikidetza unitatearen eta diru sarreren araberako salbuespenak proposatu ditu EAJk. Ibilgailuen gaineko zergan, berriz, foru arauak aurreikusten duen familia ugarientzako %50eko hobaria ezartzea eskatu du, azken hori ere, diru sarreren arabera.
Ingurumenaren zaintzarekin lotutako hobariak proposatu ditu bestalde alderdi jeltzaleak, eta horien barruan ibilgailu hibridoei %75eko hobaria eta elektrikoei %95ekoa bost urtez ezartzea eskatu du. Hondakinen bilketako zergari dagokionean, bosgarren edukiontzia aktiboki erabiltzen duten herritarrei egungo %25eko hobaria %30era igotzea. Ondasun Higiezinen Zergan ere proposatu du neurria EAJk, eta Bizigune edo antzeko programen barruan dauden etxebizitzei %50eko hobaria ezartzea proposatu du. EITak agintzen dituen irisgarritasuna, bizigarritasuna edota energia eraginkortasuna hobetzeko obren gaineko zergan %95eko hobaria proposatu du halaber, baita %75eko hobaria alde zaharrean fatxadak berritzeko obretan ere. Neurri horiek, “gobernu taldearen proposamena hobetzearren aurkeztu ditugu proposamen horiek, eta errenteriarren interesen defentsan. Erabat egingarriak iruditzen zaizkigu, eta zentzuzkoak”.
