Udalak bizkarra eman diela salatu dute eta elkarrizketa, parte hartzea eta akordioa eskatu.
![](http://oarsoaldea.hitza.eus/site/files/2018/10/Hondakinen-mahaiaren-eskaera-copia.jpg)
Hondakinen mahaia eratu dezatela eskatzeko Lezon Ondo Ai Ginen taldekoek erregistratutako eskaera.
Hiru bider eskatu dio Lezon Ondo Ai Ginen taldeak udalari hondakinen mahaia eratzeko, eta hiruretan ezezkoa jaso. Hala salatu du plataformak, hedabideetara igorritako oharrean.
Nabarmendu dutenez, eskaera guztiak udal erregistroaren bitartez egin dituzte, ofizialki, eta zehaztu dutenez, udalak idatziz bitan ukatu du hondakinen mahai deitzea eta egin dituzten beste proposamenei “isiltasunarekin edo hartu dituen kontrako erabakiekin erantzun” die.
Gaizki iruditzen zaio plataformari jokabidea. “Ez dugu uste Lezo bezalako herri batean udalaren jokatzeko modu egokiena denik elkar lana eta adostasunean baztertzea horrelako gai korapilatsu baten aurrean”, esan dute eta “arazo potoloei” aurre egiteko “eztabaida, parte hartzea eta adostasuna” behar direla defendatu”.
Horregatik, “hondakinen arazoaren aurrean udalak eta herritarrak parte hartuko luketen hondakinen mahai bat ahalik eta azkarren sortzea garrantzizkoa” dela defendatu dute “herri bizitza sano eta demokratiko baten bidean” elkarrizketa beharrekoa dela berretsiz.
Aurrekariak
Lezon azken bi agintaldietan hondakinen bilketa sistemak eztabaida sakonak sortu dituela gogorarazi du Lezon Ondo Ai Ginen taldeak eta “eztabaidak herria goitik behera zipriztindu” duela ohartarazi.
“Esan genezake eztabaida honek azken udal hauteskundeak ere baldintzatu zituela eta oraingo legegintzaldiko alkatearen eta hirigintza zinegotziaren dimisioa ekarri duela”, gaineratu dute.
Horrez gain, Jesus Mari Martiarena alkatetzara iritsi aurretik Lezoko Udalak batzorde ugari deitu izan dituela eta udala eta herritarren arteko komunikazioa egon izan dela nabarmendu dute. “Horrela egin izan da Lezon urteetan elkar lanean eta adostasunean, arazo konkretuei irteera emateko”, esan dute, eta elkarrizketaren bidea baztertu denetan bestelako arazoak azaleratu direla gogoratu dute, “Zeberio alkatearekin herriko elkarteek jai batzordea martxan jartzeko egin zuten borroka” aipatuz, edota “Zabarre haserre ekimenak herriko elkarteen ahotsak eta kexak behar den moduan tratatuak izan zitezen” jazotakoak oroitaraziz.