Pasaiako hamaikakoaren hainbat kide Euskaraldiaren aurkezpen orokorrean, Donibanen.
Euskaraldia euskara ulertzeko eta hitz egiteko gaitasuna duten herritarrei bideratuta dago, baina bere bultzatzaileek uste dute oso garrantzitsua dela egin nahi duten “esperimentu sozial erraldoian, euskara ez dakitenek iniziatiba ulertzea eta jardueraren filosofiarekin bat egitea”. Horregatik, Pasaian, bi saio antolatu dituzte, euskara ez dakiten herritarrei iniziatiba aurkezteko eta haien jarrera aktiboa sustatzeko”.
Lehen saioa Trintxerpen izango da, 18:00etan, alkateordetzan, eta bigarrena Pasai Antxokoa, azaroaren 7an, 19:00etan, kultur etxean.
Antolatzaileek zehaztu dutenez, saioetan partaideen hizkuntza ibilbidea izango da abiapuntua, eta saioak biltzen direnen beharren eta interesen arabera moldatuko dituzte.
Guztiak norabide berean
“Euskararen normalizazioaren ardura guztiona da” gaineratu dute saioen antolatzaileek, “eta horregatik beharrezkoa da ahalik eta herritar gehienek ulertzea zein erronka dituen euskarak eta norberak zein rol joka dezakeen”, gaineratu dute.
Horrez gain, euskarak prestigioa eskuratzeko babes eta laguntza gehiago behar dituela ohartarazi dute, “bereziki gaztelania hegemonikoa den testuinguruetan”.