Matxismoak hiltzen duela salatu du Pasaiako mugimendu feministak
Yolanda Jaen gogoan elkarretaratzeak egin dituzte Trintxerpen eta Antxon
Yolanda Jaen Gomezen hilketa salatzeko elkarretaratzeak egin ziren atzo arratsean Trintxerpeko Gernika plazan eta Antxoko Gure Zumardian. Matxismoak hiltzen du, hildako gehiagorik ez zioen Trintxerpeko pankarta, eta ildo beretik Antxokoak, Matxismoak berriz ere hil gaitu aldarria eskuan. Asteartean hil zen Yolanda Jaen, ospitalean. Bertan zen lehengo urriaren 16az geroztik, bere bikotea zenak etxeari nahita sua eman eta eragin zizkion zauri larrien ondorioz ingresatuta.
Pasaiako bi elkarretaratzetan zerraldoak irudikatu zituzten, indarkeria matxistak hildako emakume guztiak gogoan. Zazpi dira aurten indarkeria matxistak Euskal Herrian hildako emakumeak, eta 43 Espainiako estatuan. Zifrak nabarmendu zituzten elkarretaratzetan Pasaiako mugimendu feministako kideek, beste behin ere indarkeria matxistak eragindako heriotzak eraso isolatuak ez direla ohartarazteko.
Yolanda Jaenen hilketak sistemaren hutsuneak beste behin agerian utzi dituela salatu zuten elkarretaratzetan, eta erakundeei indarkeria neurri eraginkorrekin borrokatzeko eskatu zieten.
Bien bitartean, autodefentsa feministarako deia egin zuten eta borrokan jarraitzeko deialdia luzatu, “emakumeak aske izan arte”.
Errenteria-Oreretan eta Oiartzunen ere izan ziren elkarretaratzeak, eta mobilizazio guztiek izan dute eskualdeko udalen babesa.
Yolanda Jaenen heriotza salatzeko elkarretaratzea Antxon
