Rodriguez: "Lozorroan den herria edo aurrera egingo duen herriaren artean aukeratzeko garaia da"
EH Bilduren bi agintaldien ostean, Errenteriak "indarra" eta "distira" galdu dituela esan du PSE-EEren alkatzetzarako hautagaiak.
Alkatetzarako hautagaitza aurkeztu du gaur Jose Angel Rodriguezek alderdi sozialistaren egoitzan. Ez du bakarrik egin, Eneko Andueza Gipuzkoako PSE-EEren idazkari orokorrak hartu du parte aurkezpen ekitaldi horretan. Errenteriak, lidergoa, bultzada eta ilusioa behar dituela esan du Anduezak: “PSE-EE erreferentea izan da Errenterian, eta azken zortzi urteetan paralisi egoeran dago, alderdi sozialistako alkateek egindakoaren inertziari esker ari da aurrera egiten hala nola, Errenteriari herri proiektua falta zaiolako oraintxe. PSE-EE izan da Errenteriaren eraldaketaren protagonista, gaur egun hori falta da, non da Errenteria?”.
Errenteriak anbizioa eta ilusioa behar dituela esan du, “gogoa eta indarra dituen alkatea behar du, Errenteriak dagokion lekua har dezan berriro”. Jose Angel Rodriguezek ezaugarri horiek biltzen dituela, “behar diren balioak ditu eta kudeaketarako gaitasuna”, eta aurretik izandakoen eskarmentua ere baduela erantsi du Anduezak, “eta erreferentzia hori izatea garrantzitsua da, hori delako Jose Angel Rodriguezek duen balio erantsia. Nik dakit oso ondo egingo duela, gaitasuna duelako, ilusioa duelako, hiri proiektua duelako, alderdiaren babes osoa duelako, eta sobera prestatuta dagoen taldea izango duelako atzean. Osagarri ezinbestekoak ditugu beraz, ilusioa eta alaitasuna itzultzeko hiri honi, laino beltzak desagerrarazi eta eguzkia berriz ere ateratzeko, eta Errenteriarrak harro senti daitezen bertan bizitzeaz. ez dut zalantzarik, maiatzaren 26an herritarrek erabakitzen dutenean, zu izango zarela Errenteriako alkatea”.
Rodriguezek alkatetzarako hautagaitza Errenteriarenganako debozioagatik aurkeztu duela esanez hasi du interbentzioa, eta ohorea izango duela PSE-EEtik bere herriko interesen alde lan egitea. Errenteriak “hobetu behar duela eta hobetu daitekeela” ziur dela erantsita, Errenteriaren alde lan egingo duen taldea gidatzeko gai izango dela eta horretarako ilusioz eta gogoz dagoela esan du alderdi sozialistaren hautagaiak: “Alkate sozialistek eta egindako kudeaketa zoragarriak arrastoa utzi dute Errenteriaren bazter eta txoko guztietan. EH Bilduren bi agintaldien ostean, Errenteriak indarra eta distira galdu ditu. Alderdi sozialistak egindakoaren lepotik bizi dira. Aukeratzeko garaia da, lozorroan den herria edota aurrera egingo duen herriaren artean”.
Alkatetza lortzekotan PSE-EEren lehentasunak zeintzuk izango diren ere zehaztu du Rodriguezek. Horien artean, kale garbiketa hobetzea “auzorik baztertu gabe”; hiri segurtasuna handitzea”polizia eredu hurbilago, zuzenago eta aktiboagoa”, aparkaleku gehiago sortzea; trafikoa hobetzea; garraio publikoa hobetzea; hiri mantenua hobetzea; parke eta lorategien zaintza hobetzea; irisgarritasun hobetzea aipatu ditu.
Enplegua lehentasuna ere izango dutela gaineratu du Rodriguezek, “pultsu ekonomikoa galdu dugulako, eta hura berreskuratu egin behar dugulako berehala. Horretarako, udal enplegu plangintzak hobetuko ditugu, beharra duten bizilagun gehiagorengana heltzeko”.
Kultura arloaz ere mintzatu da alderdi sozialistako hautagaia, eta azpiegiturei egin die aipamen, Lekuonari zehazki, “gure kudeaketaren bandera ontzia izango da, eta auzoak hobetuko ditugu, a gustura eta ziur senti daitezen bere ingurune hurbilean”. Ingurumena, berdintasuna, emakumea, gazteek, kirola, aniztasun funtzionala duten pertsonak… horiek ere izango dituela agendan esan du. Aniztasuna eta elkarbizitza ere aipatu ditu, eta horietan sakontzeko konpromisoa azaldu, baita beste erakundeekin elkarlanean aritzeko asmoa.
Datozen hilabetetan programa errealista osatuko dutela errenteriarren beharrak eta eskaerak kontuan izan da esan du amaitzeko, eta horretara deitu ditu herritar eta eragileak, “ekarpenak egitera programa hori guztion artean osatzeko, eta Errenteriako alkatetza berreskuratzeko”.
