Trintxerpeko Rikardo Arrillaga kaleko igogailua martxan da
Igogailu berria jarri dute
Bost astez lanengatik zerbitzutik kanpo egon ondoren Rikardo Arrillaga kaleko igogailua martxan da berriz ere.
Udalak jakinarazi duenez Oronak egin ditu igogailu berria jartzeko lanak, eta lanen aurrekontua 42.200 eurokoa izan da.
Igogailuaren barruko makineria, kabina eta barruko sistemak aldatu dituzte, “igogailua modernoagoa eta energetikoki eraginkorragoa izan dadin”.
Pasaiako Udalak nabarmendu duenez, pasaitarren mugikortasuna errazteko lanak egiten ari dira udalerrian, irisgarritasuna hobetzeko, eta Trintxerpeko obra hau lan esparru horretan kokatu dute.
Gaineratu dutenez, herritar askoren nahiari erantzunez berritu dute igogailua, eta orain, “erabilera egokia” eskatu diete: “Igogailuaren mantentze lan egokia udalaren ardura da, baina erabilera egokia erabiltzaile guztien ardura da”.
Lanek iraun duten bitartean herritarren itsas etxeko igogailua erabiltzeko aukera izan dute, eta udalek eskerrak eman dizkie erabilera erraztu duten administrazioei.
