Arima ilunak uxatuko dituzte Donibanen eta San Pedron

Gau Beltza ospatuko dute bihar bi barrutietan

olatz mitxelena

2018/10/30

Kale zaharreko atarietan eguzki loreak zintzilikatzen zituzten arima ilunak uxatu asmoz.

Damu Santu Egunaren bezpera da bihar, eta Pasaian, Gau Beltza ospatuko dute Donibanen eta San Pedron, festa giroan garai bateko ohiturak berreskuratzeko asmoz. Donibanen iaz antolatu zuten festa lehenbizikoz eta aurten errepikatzea erabaki dute. Iaz bezala, aurten ere Ubera biblioteka izango da festa, Bibliotekaren Lagunek Aiton-Amunen aterpekoen laguntzaz antolatu baitute festa. 18:00etan hasiko da jaia Ubera bibliotekan. Kalabazak hustu, argiztatu, mozorrotu… Aurretik, baina, garai batean Donibanen zer nola ospatzen zuten ezagutzeko, hitzaldi interesgarria antolatu zuten astelehenean gaian aditu Jaime Altuna eta Josu Ozaitarekin.

Antzera San Pedron. Festaren atariko, Kalabaza Tripontzia proiektatu eta kalabazak egiteko tailerra egin zuten udal bibliotekan. Bihar, hilak 31, kalean egingo dute festa. 17:30ean, frontoian elkartu eta mozorro, soinu tresna eta eguzki-loreak prestatuko dituzte, eta 19:00etan hasiko da desfilea kale zaharretik, arima ilunak uxatzeko zarata eginez eta eguzki-loreak zintzilikatuz. Desfilea plazan bukatuko da, suaren inguruan dantzan eta gaztain erreak banatzen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.