Urko Otegi saskibaloi jokalari antxotarrak historia egingo du ostiralean LEB Oro Ligan: bertan partida gehien jokatu dituen kirolaria izango da.
Urko Otegi. Argazkia: baloncestoconp.es.
Urko Otegi saskibaloi jokalari pasaitarrak historia egingo du ostiralean. LEB Oro Ligako Palencia taldean jokatzen du antxotarrak: liga horretan partida gehien jokatu dituen kirolaria izango da, 513 denera, ostiralean jokatzen badu. Aurreko asteburuan berdindu egin zuen Otegik aurreko marka, 512 partidakoa, A Coruñan Chocolates Trapa Palenciak irabazitako partidan. Esan daiteke Gipuzkoako historiako saskibaloi jokalari historikoenen artean dagoela 36 urteko pasaitarra. Aurreko marka Burgos taldeko Jorge Garciak zuen.
512 partida, 14 sasoi eta 11.000 minututik gora LEB Oro Ligan. Eta hori gutxi balitz, sasoi betean dago 204 zentimetro neurtzen dituen jokalaria: aurreko jardunaldian, LEB Oro Ligako —Espainiako Estatuko bigarren liga da, ACBkoaren atzetik— jokalari baliotsuena izan zen (MVP delakoa), 35 puntuko balorazioa lortu zuelako Coruñaren kantxan Palenciak lortu zuen garaipenean: 23 puntu sartu zituen, 6 erreboterekin, beste sei asistentziarekin, bi baloi lapurretarekin, eta jasotako lau pertsonalekin.
Ostiralean, 21:00etan eta Palenciako kiroldegian egingo du historia Otegik, orduan jokatuko du LEB Oron 513. partida, Valladolideko taldearen kontra —Gaztela Leongo derbia da—. Ziur, horretan ere bikain ibiliko dela, eta errekorrak hausten jarraituko duela.
Urko Otegiren bidea saskibaloian:
- Gazte kategoriak: Askatuak Saskibaloi Taldea
- 1999/00: Cafes Aitona (EBA Liga)
- 2000/02: Palencia Baloncesto (EBA Liga)
- 2002/05: Menorca Basquet (LEB Oro Liga)
- 2005/06: Cantabria Lobos (LEB Oro Liga)
- 2006/07: Baloncesto Leon (LEB Oro Liga)
- 2007/08: Baloncesto Leon (ACB Liga)
- 2008/12: Menorca Basquet (ACB eta LEB Oro ligak)
- 2012/17: Quesos Cerrato Palencia (LEB Oro Liga)
- 2017/19: Chocolates Trapa Palencia (LEB Oro Liga)
