Lintziringo eremuaren biziberritzea, bukatuta
Zerbitzu bideak segurtasun eta irisgarritasun handiagoa emango dio inguruari, eta ekonomia suspertzen lagunduko duela uste dute udalak eta aldundiak
Lintzirin eremua biziberritu dutela eta, Jexux Leonet Oiartzungo alkatea eta Gipuzkoako ahaldun nagusi Markel Olano eta Aintzane Oiarbide Bide Azpiegitura diputatua bertara hurbildu dira gaur eguerdian.
Lanen emaitzak bertatik bertara ikusita, pozik daude Lintziringo eremua nola geratu den ikusita. Egunean 38.000 bat ibilgailu pasatzen dira bertatik, eta industria eta merkataritza gune garrantzitsua ere bada. “Zerbitzu bide berriarekin”, esan du Olanok, “inkorporazioak ordenatuko dira eta segurtasuna irabazi du GI-636 errepideak”.
Biziberritzea integrala izan da. Alegia, trafikoa ordenatzeaz gain, irisgarritasuna eta oinezkoentzako bide seguruak bermatu dituzte. Udala zein aldundia bat datoz biziberritzeak inguruko ekonomia berpizten lagunduko duela. Leoneten arabera, hori da udalaren helburu nagusietako bat: Lintzirin aldera ekonomia jarduera berriro erakartzea.
Oiarbidek, bere aldetik, segurtasuna handitu izana nabarmendu du. Gipuzkoako bide azpiegituren segurtasun estandarrak areagotzeko hobekuntzen testutinguruan kokatu du Lintziringoa.
Hiru fase
Lanak hiru fasetan egin dira. Berriena zerbitzu bidea izan da. Aldundiak 500.000 euro ordaindu ditu, kostuaren %54 inguru. Gainontzekoa udalak eta bertako enpresek jarri dute.
Lankidetza publiko-pribatua bilatu dute aurreko bi faseetan ere. Eremua biziberritzeko ekarpen ekonomikoak egin dituzte bertako enpresek, eta prestutasun hori eskertu du Oiartzungo Udalak.
Hiru faseek 2.200.000 euroko kostua izan dute. Oiartzungo erakunden artean 1.700.000 euro jarri dituzte: 1.100.ooo euroko inbertsioa egin du udalak, eta 600.000koa enpresek. Beste milioi erdia aldundiaren ekarpena izan da. 
