EMKE bandak eta Andra Mari Abesbatzak kontzertu bateratu eskainiko dute hilaren 23an Santa Zezilia egunaren harira
Santa Zezilia egunaren harira Andra Marik eta EMKE Bandak egingo duten kontzertua aurkeztu dute Sierrak, Lopez de Etxezarretak eta Aierdik.
Santa Zezilia egunaren harira kontzertua eskainiko dute EMKE Bandak eta Andra Mari Abesbatzak.
Frantziar erara goiburuarekin, Frantziako konpositoreen doinuak aukeratu dituzte emanaldirako. Berezia izango da. Hala esan du aurkezteko gaur egin duten agerraldian Alain Aierdik, EMKEren zuzendariak, “Iñaki Susperregi, zendu den bandako kidea omenduko dugu, musikari eta banderadun zenari Musika Kultur Elkarteko urrezko domina eskainiko dio Musika Bandan egin zituen 50 urteengatik”. ez da omenduko duten bakarra, bandan jotzen 25 urte bete dituzten Eneritz Gurrutxagak eta Alberto Almendrok zilarrezko domina jasoko dute: “Gure herrian musika hedatu eta zabaltze arloan urteetan, eskuzabaltasunez betetako lanaren ondo merezitako aitortza izango da”.
Egitarauari dagokionean, kontzertuan Frantziako musikari ospetsuenen lanetan zehar bidaia eskainiko dute hilaren 23ko kontzertuan Musika Bandak eta Andra Marik: Gounoud, Saint Saensen, Faure edota Bizet.
Emanaldia bi zatitan banatuko da, lehengoan Errenteriako Musika Banda izango da Andra Maria Fatimaren agertokian, eta bigarren zatian, Andra Mari abesbatza batuko zaie. Guztira 105 lagun arituko dira.
Aukeratutako doinu guztiak erreferentzialak direla azaldu du Aierdik, eta ohorea dutela Andra Marirekin batera aritzea kontzertu horretan nabarmendu du.
Andra Mari abesbatzako zuzendari Andoni Sierrak eskerrak eman dizkio halaber EMKE Bandari, elkarlanerako gonbita egiteagatik, eta elkarteen arteko elkarlana gakoa dela esan du, ” aproposa da oso programa, eta errepertorioa erraz erraz jarraituko dute entzuleek, atsegina izango da oso”.
Garazi Lopez Etxezarreta zinegotzia ere izan da agerraldian, eta Andra Mari eta EMKE Banda herriko musika elkarte esanguratsuenetako bi direla nabarmenduta, igandeko kontzertua “luxua” izango dela esan du, “berezia oso”.
Euskaraldiaren hasierarekin bat egingo du kontzertuak eta horri ere egingo diote keinu. Josu Mitxelena EMKE Bandaren lehendakariak euskara erabiliko du kontzertuaren aurkezpena egiteko, eta bereziki aipatuko du Euskaraldia, jendea iniziatiban parte hartzera deituta.
Kontzertua Andra Maria Fatimaren elizan 20:30ean izango da.
