Edukiontzi marroietan utzitako hondakinak egiaztatu eta kontrolatzea bizilagunen intimitatearen kontrako erasoa dela esan du alderdi sozialistak.
PSE-EEko Isaac Palencia eta Jose Angle Rodiguez, bozeramailea.
Hilabete honetatik, edukiontzi marroian, hau da hondakin organikoak biltzen diren ontzian, bizilagunek utzitakoen egiaztatze eta kontrola hasi duela udalak salatu du PSE-EEk gaur goizean egin duen agerraldian. Udaltzaingoko CCOO sindikatuak udaletxean aurkeztutako kexa bat oinarri hartuta, gogor salatu du EH Bildu eta Errenteria Irabaziz osatzen duten gobernu taldearen jarrera: “Hainbat auzotan edukiontzi marroietan bizilagunek utzitako poltsak kontrolatzen hasi da udala, arau hauste bila. Neurri horrek, gure ustez, bizilagunen intimitateari erasotzen dio”.
Hondakinen jarraipena egiteko udala erabiltzen ari den prozedura azaldu du Jose Angel Rodriguez alderdi sozialistako bozeramaileak: “Edukiontzi marroietatik poltsak hartzen dituzte eta zonaldearen arabera sailkatzen dituzte. Zabaldu egiten dira ondoren, zuzen sailkatuta dauden ikuskatzeko, eta ez bada horrela, zein saltoki edo bizilagunek bota duen jakiteko pistak bilatzen dituzte. Udaltzaingoak hondakinei argazkia egiten die, eta arau hauslea lokalizatzen du dagokion txostena egiteko”.
Neurria bera, “oso larritzat” jo du, “bizilagunen intimitatea eta pribatutasuna urratzen dituelako”, eta harago jo du, hondakinen gainean udalean ordezkaritza duten alderdi politiko guztiek lortutako kontsentsua apurtzea ere leporatu dio gobernu taldeari, “oraingo erabaki hau, hasi berri duen kanpaina edukiontzietan botatzen dena kontrolatzeko, unilateralki hartu duelako, beste alderdiei ezer jakinarazi gabe, ezkutuan”. Horren harira gardentasun falta egotzi dio “herritarrekiko batez ere, baina baita beste alderdietako ordezkariekiko ere”.
Edukiontzi marroiko poltsak “kontrolatzeko” hartutako neurriak bertan behera uzteko berehala galdegin du alderdi sozialistak, erabateko gaitzespena eta haserrea azalduta: “Neurriak ez du oinarririk eta gainera zaborra arakatzea bizilagunen pribatutasuna eta intimitatea legez kontra urratzea da”.
