[Galeria eta bideoak] Aita Manuelek badu eskultura

Atzo inauguratu zuten, berak irabazitako banderak inguratuta, San Pedroko Torrean.

olatz mitxelena

2018/11/19

Aita Manuel Eguna ospatu zuten atzo San Pedron, eta aspaldiko amets bati bide eman zioten Zu Etxerako Manuel herri iniziatibaren bueltan bildutako herritarrek: San Pedroko patroi mitikoaren eskultura inauguratu zuten. Zigor Gartzia sanpedrotarrak sortutako eskultura Torrean kokatu dute, eta han dantzatu zioten batelerek eta arrantzaleek, Kaxarrankan, San Pedroko arraun zaleak bertan zirela, eta Aita Manuelek irabazitako trapu preziatuak inguratuta. Musika Abesbatza Astea Aita Manuel Egunaren ospakizuna Ondartxo Abesbatzak antolatutako Musika Abesbatza Astearen barruan kokatu behar da. Larunbatean abiatu zen musika astea, Josu Elberdinek Gema Cesek eta Idoia Larrañagak idatzitako ipuinarentzat sortutako suite koralaren estreinaldiarekin. Musika Asteak datorren asteburuan jarraituko du, hiru kontzerturekin. Hilaren 22an, 20:00etan, Emakumea eta itsasoa izenburupean, emakumeek portu inguruan egindako lanak ekarriko dituzte gogora, musika eta argazkiak lagundutako emanaldian. Hilaren 23an, berriz, Pepita Enbil kantaria omenduko dute, eta horretarako luxuzko kontzertu bat antolatu dute, Elisa di Prieto eta Klara Mendizabal sopranoek interpretatuta, Oier Etxaburu pianistaren laguntzaz. 20:00etan izango da kontzertu, elizan. Azkenik, hilaren 24an, larunbata, Andra Mari Koralaren kontzertua, Alize Mendizabal organistak lagunduta. Emakume musikagileen obrak interpretatuko dituzte. 19:30ean hasiko da eta elizan izango da baita ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.