Lurdes Sistiaga eta Oiartzungo Intxixu Trail nahiz Lezoko Lezo-Jaizkibel mendiko lasterketak izango dira aurten Oarsoarrak Saria jasoko dutenak
Lurdes Sistiaga.
Oarsoaldeko Euskara Batzordeak erabaki du nori eman 2018ko Oarsoarrak Euskararen Sariak: norbanakoen atalean Lurdes Sistiaga sanjuandarrak jasoko du aitortza nagusia, eta Oiartzungo Intxixu Trail eta Lezoko Lezo-Jaizkibel mendi lasterketak ere nabarmenduko dituzte. Sari emate ekitaldia hilaren 30ean da, 19:00etan Errenteria-Oreretako Merkatuzarren. Ekitaldi irekia da, edonor joan daiteke.
Oarsoarrak sarien epaimahaia Oarsoaldeko lau udalek, Oarsoaldeko AEK-k, Oarso Bidasoko Hitzak, Errenteria-Oreretako Lau Haizetara Euskaltzaleon Topaguneak, Errenteriako Udal Euskaltegiak eta Oiartzungo Ttur-Ttur Euskaltzaleon Bilguneak osatzen dute. Hainbat proposamen aztertu dituzte, eta lehen aipatutakoak onetsi egin dituzte aurtengo sariak emateko.
Lurdes Sistiaga irakasle gisa aritu da urte luzez, Pasaia-Lezo Lizeoan. Bertako guraso, eta orain amona da egun. Euskararen aldeko lana izan da bere bizitzaren ardatza, ez bakarrik ikasgelan, herrian ere. Ezagutzen duten guztiek, Oarsoaldeko Euskara Batzordeak nabarmendu duenez, bere jarrera baikor eta eraikitzailea aitortzen dituzte gauza guztien gainetik, “besteekiko goxotasuna da bere marka”. Orain, erretiroa hartuta, euskararen alde lanean jarraitzen du adinekoen artean euskarazko harremanak sustatzen, kantu jiran, Euskaraldian eta abarretan.
Lezo-Jaizkibel mendi lasterketa otsail aldean eta Intxixu Trail ekain aldean izaten dira. Biek ala biek euskaraz antolatzen dituzte hasi eta buka lasterketaren joan-etorri guztiak. Antolaketa osoaz gain, eguneko bozgorailuetako mezu eta ohar guztiak euskaraz egiten dituzte, euskarari kirolean normaltasun osoko maila emanez. Lezoko lasterketa Lezotarrak Lasterkari Taldeak antolatzen du; Oiartzungoa, Girizia Intxixu Trail taldeak.
Esan bezala, sarien banaketa hilaren 30ean egingo da, 19:00etan, Errenteria-Oreretako Merkatuzarren.
