Maskarak kendu eta jarriz, barnea garatu
Urte bukaeran, Xabi Lopezek ‘Gorputz emozionala. Neutralitatetik komediara’ ikastaroa emango du Oiartzunen. Antzerkia maite dutenei zein esperientziarik ez dutenei bideratuta dago.
[Ilustrazioa: Isabel Mancebo Balda].
Hiru maskara landuko dituzte:?neutroa, sudur gorria eta komediarenaBigarren maskara, berriz, sudur gorri bat izango da, eta hori bera erabiliko dute maskara bezala, bakardadea eta hutsunea lantzeko. Azkenik, commedia dell’arte-ko maskararekin bukatuko dute. Tailerra baino, laborategi Lopezek hainbat maskara erosi zituen, eta behin horiek edukita, tailer bat emateko gogoa piztu zitzaion. Hala ere, tailer hitza baino nahiago du esan laborategi bat dela. Kimikoetan bezala, esperimentatzea izango da haien helburua. «Saioetan ez dut esan nahi zerbait ongi ala gaizki dagoen. Eszenikoki asko lantzen da pertsona bat besteen aurrean jartzea, eta gero txandakatzea —badaude denak batera gauden ariketak—. Hori da lan gogorrena, eta irakasleak feedback-a ematen dio. Ez da esaten zer dagoen ongi eta zer gaizki, baizik eta zerk funtzionatzen duen eta zerk ez». Balizko adibide bat ekarri du: gorputz mugimendua ikasita duen aktore batek parte har dezake tailerrean, baina ideiarik ez duen beste batek ere. «Ideiarik ez duen horrek harrituta utz gaitzake. Akatsetatik ere ikasten da». Laborategi hori bizirik egongo den zerbait izango dela aldarrikatu du, ez dela zientzia zehatz bat izango. Ikastaroaren abiapuntua maskara neutroa izango da, eta gero iritsiko dira beste bietara. Hori bai, lehenago beroketa lanak egingo dituzte. Behin berotuta, maskarak zeintzuk izango diren ikusiko dituzte, eta bakoitzak zein informazio ematen duen. Lopezek azaldu duenez, «milaka bidai» egin daitezke maskarekin, eta horietako hainbat ateratzea izango da maskara neutroarekin lan egitearen helburua. «Nahiko poetikoa da, eta ez da batere erraza ulertzen: ‘Zergatik ez du adierazten emoziorik? Nola liteke? Nola da ikusten duena, lehen aldiz ikusten duena eta azkena aldi berean’».
Hiru maskara landuko dituzte:?neutroa, sudur gorria eta komediarenaEz da Gorputz emozionala lelopean emango duen lehenengo ikastaroa izango. Izan ere, badu eskarmentua lehenagotik: Argentina iparraldean, Bolivian eta Perun bidaia bat egin zuen, eta han aritu zen bertakoei zuzendutako eskolak ematen. Jakinarazi duenez, han konturatu zen gorputzaren adierazteko bideak —negarra, haserrea, irribarrea…— berdinak direla toki guztietan, baina toki batzuetan nabaritu duela eszenara ateratzeko modu ezberdina. «Agian hemen ere pasatuko da», zehaztu du, «hau ez da munduko tokirik irekiena, eta Andeetan bizi direnak ezta ere ez dira irekienak. Azkenean, denok ditugu gure segurtasun-ezak». Horregatik, maskarek funtzio bikoitza izan dezakete. Alde batetik, babesa ematea, eta bestetik, maskara bera jantzi gero kendu ahal izateko. Mundu guztiari irekia Hasiera batean, Lopezek argitu duenez, Txinalka taldeko kideentzako zegoen zuzenduta, baina horko denak ez ziren apuntatu. Horregatik, ikastaroa edozein pertsonari irekita egongo da: «Argi edo itzal zatitxo bat partekatu nahi duen orori zuzenduta dago; ez da antzerkian ibiltzen den jendearentzat bakarrik. Bakoitzak zer sentitzen duen jakin nahi duenarentzat egokia da, batzuetan ez baitakigu zer sentitzen dugun». Ikastaroa abenduaren 26, 27, 28 eta 29an, eta urtarrilaren 2, 3 eta 4an izango da, 10etatik 14etara. Oiartzuarrentzat 70 euroko prezioa izango du matrikulak —udalak diruz lagunduko du—, eta kanpokoentzat 120. Izena eman nahi duenak 647 91 55 92 telefono zenbakira deitu beharko du.
