Haur parkeen egoeraren jarraipena egin duela azken hilabeteetan dio EAJ, eta oro har "nahiko utzita" daudela ondorioztatu du.
Haur parkeak oro har nahiko utzita daudela dio EAJk. ARGAZKIA: EAJ
Azken hilabeteetan haur parkeen jarraipena egin duela eta oro har nahiko utzita daudela ondorioztatu du EAJ-k. Horren harira, horien mantenurako diru zatia handitzeko eskatuko du gobernu taldeak egin duen aurrekontu proposamenari aurkeztutako emendakinetako batean. Emendakin horien prestaketan lanean ari dela, eta haur parkeen mantenurako gobernu taldeak aurkeztu duen diru zatia “motz” gelditzen dela iritzita emendakina aurkeztu dute hura handitzeko.
Agintaldiaren barruan hainbat jolas parke konpondu direla aitortuta, oro har “nahiko utzita” daudela esan du alderdi jeltzaleak: “Puntualki bat edo beste berritu bada ere, hamarnaka dira gure auzoetan dauden haur parkeak eta gehienetan ezer gutxi egin denez, horien egoera nahiko kaxkarra da, oro har”. Parkeen azterketa egiteaz gain, urtez urte helburu horrekin egin diren inbertsioak aztertu dituela jakinarazi du, eta hainbat datu eman ditu: “2015ean urbanizazioak kontu sailaren barruan haurren parkeen mantenua txertatuta bazegoen ere, ez zen horietan inbertsiorik egin. 2016an Antonio Valverde parkea konpontzea aurreikusten zen, baina ez zen horrelakorik egin. Urte horretan Beraungo parkearen estaldura kontu saila sortu, eta hori izan da agintaldian egin den inbertsiorik handiena haur parkeei dagokienean, 178.475,06 euro zehazki. 2017an berriz ere aurreikusi zen Antonio Valverde parkea berritzea, eta berriz ere, ezerezean gelditu zen eta haur parkeetan soilik 7.600,13 euro erabili ziren, Pontikakoa konpontzeko. Aurten konpondu da, azkenik, haur parke hori. 2018ko aurrekontuan Bell Haur parkeak izeneko 20.000 euroko kontu saila du, eta Bizarain ikastetxeko jolas parkea eta Honbrados Oñatibiakoa konpontzeko. 2019rako aurkeztutako aurrekontu proposamenak, azken kontu sail hori mantentzea baino ez du aurreikusten eta motz deritzogu”.
