Andonaegiko futbol zelaia kudeatzeari uko egin dio CD Trintxerpek
Udalak ez dituela ondo tratatu salatu dute, babesa behar izan dutenean ez zaielako eskaini.
Futbol zelaiaren erabileraren harira gutxietsita sentitzen zela salatu zuen lehengo ostiralean Sanpedrotarra Futbol Elkarteak eta gaur Trintxerpe Kirol Elkarteak Andonaegiren kudeaketari uko egiten diola iragarri du, Pasaiako Udalak “umildu eta mespretxatu dituela” argudiatuta.
Liskarrak sortu dira Sanpedrotarra eta Trintxerpe futbol elkarteen artean, eta Trintxerperen arabera udalak ez du behar bezala esku hartu.
Gauzak honela, Sanpedrotarraren kontra ezer ez duela argi utzi nahi izan du Trintxerpek: “TKE-k adierazi nahi du ez duela ezertxo ere inor ez eta inongo kirol talderen aurka ere; aitzitik, gure jokalari, prestatzaile, laguntzaile eta bere konfiantza osoa gugan jarri duten familien interesak defendatu besterik ez dugu egiten”. Zelaiaren kudeaketarako Pasaiako Udalarekin hitzartutako akordio betetzea eskatzen du Trintxerpe Kirol Elkarteak, eta aipatu hitzarmenak ordutegiak antolatzeko ahalmena zuri-urdinei aitortzen diela ohartarazi dute.
Trintxerpek jakinarazi duenez, baina, Pasaiako Udalak ordutegi berriak ezarri ditu hilaren 5eko ebazpen baten bidez eta horrek giroa aztoratu duela jakinarazi du, elkarbizitza arazo larriak aipatuz:: “Sanpedrotarra FE-k ez du errespetatzen aipatu ebazpena eta egoera behartu eta bihurritu du gure taldeen lan saioak galaraziz, tentsioa sortuz eta irainen artean, udaltzaingoaren aurrean”.
Honen aurrean Pasaiako Udalak ez duelako ezer egin kexu dira eta “inpotentzia eta babes eza” salatu dituzte. “Zer gerta liteke Trintxerpek modu berean jokatuko balu? Zeinena litzateke balizko liskarrak eta oldartzeen erantzukizuna?”, galdegin dute, eta “errespetu eta hezibide onen balioak sustatu eta gordetzearen alde” egin dute.
Gauzak honela, Trintxer Kirol Elkarteak zelaiaren kudeaketari uko egiten diola jakinarazi du, eta instalazioen giltzak Pasaiako udalari eman dizkiola jakinarazi.
Trintxerperen komunikatua
