Ingurumen Baimen Integratua eman diotela, eta Papresak eskatutako jardueraren zabalkuntza ere onartu diotela salatu du talde ekologistak.
Papresaren kokapena “anakronikoa” izateaz gain, bizilagunen bizi kalitatean eragiten duela salatu du Eguzkik.
Papresari “txeke zuria” eman diotela uste du Eguzki Talde ekologista eta Antinuklearrak. Izan ere, Papresari Ingurumen Baimen Integratua eman diote egunkari papera fabrikatzeko jarduerarako eta kogenerazio instalaziorako, eta horrekin batera, enpresak berak eskatutako jardueraren zabalkuntza eman diote hondakin ez arriskutsuak kudeatzeko. “Tramitazio horren berririk ez digute eman gure ordezkariek gure premiak adierazi ahal izateko. Horren aurrean azalpen egokiak exijitzen ditugu, baina badakigu apirilaren 26an txosten bat egiteko jakinarazpena jaso zutela, eta kasualitatez, ez dagoela txostenik”.
harago jo du Eguzkik, eta gaia azaroaren 28ko Ingurumen Aholkularitza Kontseiluan landu zenean “ezjakintasun sentsazioa” antzeman zutela esan du: “Nora begia ari dira gure ordezkariak, potentzialki kutsatzaileena den eta erdigunean jarraitzen duen tamaina horretako bakarraren baimenaren tramitazioaren inguruan ez ikusiarena egiteko?”.
Haserre azaldu da Eguzki. XXI. mende betean “gogaikarria eta kutsatzailea” den enpresa herri gunean izatea “anakronikotzat” jo du: “Halako kokapena duen enpresa bakarrenetako bat izango da, herri guneetan zeuden enpresak, industria guneetara lekualdatu zituztelako 1980 eta 1990. hamarkadetan. Papresak, ordea, kokapen hori mantentzea lortu du, eta ez du gainera, aldatzerik planteatu ere egin”.
Ingurumenean duen eragin zuzenaz gain, bizilagunen bizi kalitatea murrizten duela salatu du, “karbono monoxidoa, nitrogeno oxidoak, sufre oxidoak, eta kutsatzaileak diren beste hainbat partikula atmosferara isurtzeaz gain, ingurune hidrikora hamabost kutsatzaile isurtzen ditu: artsenikoa, merkurioa, beruna eta zianuroa, besteak beste”. Hori gutxi balitz, lohiak eta usain txarrak, garraio astunak eragindako zaratak, eta paisaian duen eragina aipatu ditu talde ekologistak, “halako eraikin puska alde zaharretik 50 metrora dago”.
