Segurtasunaren alde Errenteria egiten ari den apustuaren erakuslea dela datu hori esan du udalak, eta apustu horren parte dela udaltzaingoaren eredu aldaketa gaineratu.
Udaltzaingoaren eredu aldaketaren aldeko apustua egin du udalak. Argazkia: Herri Bizia
Udaltzaingoko 19 agentegaiek pasa den asteazkenean hasi zutela prestakuntza jakinarazi du udalak, Arkauteko (Araba) Polizia eta Larrialdietako Euskal Akademian. Araba, Bizkai eta Gipuzkoako hainbat herritako 251 udaltzain agentegaik jasoko dute prestakuntza bertan datozen zazpi hilabeteetan, eta Errenteria da udaltzain agentegai gehien dituen hirugarren herria Bilbo (110) eta Gasteizen (28) ondotik.
Segurtasunaren alde Errenteria egiten ari den apustuaren erakuslea dela datu hori esan du udalak, eta apustu horren parte dela udaltzaingoaren eredu aldaketa erantsi du, “udaltzain erreaktiborik, prebentibo eta proaktibora aldatu da. Agenteen zereginetako bat da auzotarrekin, elkarteekin, ostalari zein dendariekin hitz egitea, auzoak zuzenean ezagutzeko, eta delituak gertatu aurretik saihestu ahal izateko”. Azken hori lortzeko, udaltzaingoa eta herritarren arteko eguneroko elkarreragina ezinbestekoa dela erantsi du.
Segurtasuna eskaintzeaz gain, trafiko zuzentzea, eta kalean udalaren ageriko irudia izatea ere badirela udaltzaingoaren eginkizunak esan du azkenik, “herritarrak behar duenean erabil dezakeen zerbitzu bat da udaltzaingoa”.