[Bideoa eta galeria] Zinema platoa da gaur Lezo Herri Eskola
Euskal Eskola Publikoaren matrikulazio kanpaina bertan grabatzen ari dira eta bertako ikasleak izango dira protagonistak.
Aktore lanetan ari dira gaur Lezo Herri Eskolako ikasleak. Lezo Herri Eskola zinema platoa bihurtu da gaur egun osoz. Euskal Eskola Publikoaren matrikulazio kanpainaren iragarkia grabatzen ari dira bertan, goiz-goizetik, eta arratsaldera arte arituko dira lan horretan. Protagonistak, Lezo Herri Eskolako ikasleak. Beraiek ere, aktore izango dira egun batez.
Ez dela erraza izaten haurrekin grabazioa egitea aitortu du Eguzkine Armenteros Irusoin enpresako ekoizleak, enpresa bereko Nacho Saenz errealizadorearekin ari da grabazioa egiten, “ez daude ohituta grabatzen, eta urduri jartzen dira, baina elkarren babesean oso ondo moldatzen dira eta horrela egiten ari gara hemen ere, taldean ari dira”. Lehen aldia da iragarkia profesionalekin grabatzen ez dutela, baina hala ere, eskolaren aldetik laguntza izugarria jasotzen ari direla aitortu du.
30 segundoko iragarkia egi bihurtzeko hamar orduko lana egin beharko dute, 08:00etan hasita, 18:30ean amaituko dute iragarkia egiteko behar dituzten irudi guztiak hartzen. Irusoin enpresako bi kideez gain, Sendoa Cardoso argazkilaritza zuzendaria eta errealizadorea ari da argazkiak egiten, Argi Ilunak enpresako langileak argiztapen lanak egiten, eta Drama FX enpresako kideak, berriz, dekorazioarekin, hamasei lagun guztira.
Agertokiei dagokienean, informatika gela, jolastoki estalia, jangela, ikasgelak, auditorioa, irrati gela, eta baratza aukeratu dituzte, besteak beste.
Olatz Aldabe Lezo Herri Eskolako zuzendaria pozik azaldu da: “Ilusio handiz hartu dugu iragarkia gure eskolan grabatzea. Uste dugu eskola publikoaren irudi bezala gure eskola aukeratzea oso polita dela. Haurrek ere, oso pozik hartu dute, saltsa handia dago gaur eskolan. Gai pedagogikoetan eredu izatea gustuko dugun bezala, honetan ere Lezo Herri Eskolaren irudia hartzea iragarkia egiteko oso polita iruditzen zaigu eta interesgarria”.
Iragarkiak hilaren 21ean ikusiko du argia, Euskal Eskola Publikoaren matrikulazio kanpaina hasi baino astebete lehenago. Lezo Herri Eskolako aktore txikiek gogoz itxoingo dute unea.
