Mexiko, munstroak eta ezkontzak
Pasaitarrak inauteriak prestatzeko lanean hasiak dira
Trintxerpen munstroan gaia gailendu da Korkoiburuek plazaratutako bozketan Gaiak hautatu dituzte, eta orain irudimena astintzea, sormena bor-bor jartzea eta mozorroak sortzea besterik ez da falta. Pasaian erabakiak dituzte jada inauterietarako gaiak. Martxoko lehen asteburuan ospatuko dituzte inauteriak Antxon, Donibanen eta San Pedron, eta astebete beranduago Trintxerpen, ohi bezala.
Trintxerpen eta Antxon boto bidez hautatu dituzte gaiak; Trintxerpen Korkoiburuek proposatuta eta, Antxon, Gazte Asanbladaren ekimenez.
Trintxerpen Euskararen Eguna bitartean proposamenak biltzen aritu ziren Korkoiburuak, eta Euskararen Egunaren festan bildutakoek bozkatuta gai finalistak hautatu zituzten. Aukeran hiru gai izan dira: Mexiko, Greace pelikula eta munstroak, eta aipatutako azkena gailendu denez, inauteri beldurgarriak espero dira aurten Trintxerpen. Ikaratzekoak.
Pasai Antxon, berriz, askoz ere gai eztiagoa hautatu dute gazteek: ezkontza. Ikusi behar ezkontza denak zorioneko diren. Litekeena, guztiz kontrakoa. Aukeran, beste hiru gai izan dira Antxon: Espainia, ETB eta iraultzak, baina ez dute babes nahikorik lortu.
Bien bitartean, Donibanen, gazte eta heldu, denak bat eta gai bakarraren bueltan ariko dira berriz ere. Aurten rancheren erritmoan ospatuko dituzte inauteriak, Mexiko hautatu dutelako sanjuandarrek gaitzat. Azarotik dabiltza entseatzen desfilean irteteko, eta apaingarri eta joste lanen prestaketan ere hasiak izango dira gehientsuenak.
San Pedron, bien bitartean, erabakitzeko dute oraindik inauteriak nola ospatu, baina azken urteetan gai librean aritu dira, norbere irudimenari bide emanez.
Horiez gain, noski, konpartsak irtengo dira, norbere gai propioarekin. Guztietan hasiak dira entseatzen, eta prestaketetan.
