Udaltzaingo eredu "proaktibo eta prebentiboa" babestu du udalak
Errenteriako Udaltzaingoaren CCOO sindikatuak auzoko poliziaren figuraren aurka egindako adierazpenak "desegokitzat" jo ditu udalak. Sindikatu horrek, behar bezain beste udaltzain ez daudela eta segurtasun plan bat behar dela esan du, gainera.
Errenteriako Udaltzaingoaren CCOO sindikatuak auzoko poliziaren figuraren aurka egindako adierazpenak “desegokitzat” jo ditu udalak. Sindikatu horrek, behar bezain beste udaltzain ez daudela eta segurtasun plan bat behar dela esan du, gainera. Udaltzaingoko CCOOeko sekzio sindikalak, herriko hainbat eremutan segurtasunaren gaineko eztabaidak hautsak harrotu dituenean heldu da, gainera, eta herritar batek jasandako erasoa erabiltzea egotzi dio sindikatu horri udalak “errebindikazio sindikal bat egiteko”.
Ez dela inoiz sindikatuen prentsa oharrak edota adierazpenak erantzutekoaren aldekoa izan inoiz esanda, duela astebete eskas herritar batek jasandako erasoa erabiltzea aldarrikapen sindikala egiteko “bereziki desegokia” dela nabarmendu du, eta horiek horrela, sindikatuak egindako adierazpen horiei erantzun behar diela.
Udaltzaingoko CCOO sekzio sindikalak auzoko poliziaren aurka mintzatu dela, segurtasun plan bat behar dela, eta Udaltzaingoaren barruan ez dagoela behar adina kide esan duela azaldu du udalak, eta guztietan espekulatzea leporatu dio, “inolako oinarririk gabe, haien ustez horrek guztiak herritarren segurtasunaren gainean duen eraginean”.
Auzoko poliziaren gainean mintzatu da lehenik udala, eta gogora ekarri du, 2011ko hauteskundeen ondoren Udaltzaingoaren jarduteko eredua aldatu eta hobetzeko apustua egin zuela, “ordura arteko poliziaren ereduaren arabera agenteak ibilgailuan sartuta egoten ziren esku hartzeko deia jaso arte. Kexa zegoen herritar gehienen aldetik, kalean udaltzain faltagatik. Ikerketa prozesua egin eta erreferentziazko beste tokiko polizia batzuekin kontrastatuta, auzoko poliziaren figura jarri zen abian”. Udalak plantillan zeuden plaza huts batzuk bete zituela era horretan kide kopurua handituz erantsi du.
Polizia eredu horren helburua prebentzioa bultzatzea dela dio, “delitua saihesteko jardutea. Auzoko agenteak ez du modu erreaktiboan jardun behar, proaktiboan baizik. harremana izan behar du herritarrekin, informatu, eta beti egongo da patruila bat bi kiderekin edo beharrezkoak direnekin, behar izanez gero esku hartzeko. CCOOek babesten duen ereduan berriz, eskatzen zaienean baina ez dute esku hartuko agenteek”.
Herritarren Segurtasunerako Kontseilua
Errenteriako Udalak Herritarren Segurtasunerako Kontseilua jarri zuela habian ekarri du gogora, bestalde, Araba, Bizkai eta Gipuzkoako bakarretakoa bere hitzetan. Kontseilu horretan, Ertzaintzak, Udaltzaingoak, udal departamentuek, eta gizarte arloan lan egiten duten eragile batzuk osatzen dute. Helburua, ikuspegi integral batetik segurtasunari erantzutea duela kontseilu horrek azaldu du udalak. EHUrekin diagnosia eginda, segurtasunerako ekintza plana idatzi zela erantsi du, “dagoeneko inplementatzen ari gara plan hori, hortaz, badugu segurtasun plan bat CCOOk esaten duenaren aurka”.
Segurtasun plan orokorraz gain, ahulen diren herriko guneetan eragiteko esku hartze plan bat baduela esan du udalak: “Plan horrek dagoeneko ekarri ditu eta oraindik ere ekartzen ari da hainbat esku hartze, polizaren presentzia kalean, leku arriskutsuenetan argi gehiago jartzea, eta koordinazio handiagoa Ertzaintzarekin”. Duela gutxi Juan Olazabal kaleko bizilagunei eta Iztietako auzo elkarteari zein auzo horretan lan egiten duten beste eragile batzuei plan horren berri eman diela esan du udalak, gainera.
Udaltzain nahikoa ez daudela ere esan du CCOOsindikatuak, eta horri ere erantzun dio udalak, datuekin: Bi ofizialorde izatetik lau izatera pasatu dira eta TAO zerbitzuaren publifikazioa dela-eta 18 agente (11 plaza berri) formazioa jasotzen ari dira Arkauten udan Errenterian lanean hasteko, “CCOOren gustukoa ez bada ere, poliziaren erdu prebentiboa sustatzeko izango da, delitua saihesten duen polizia eta segurtasunaren gainean modu integralean jarduten duena”. TAOren kontrolak segurtasunaren zaintzan orduak murrizten dizkiela gezurtatu du azkenik udalak: “11 agente berri kontratatu dira, eta TAO zerbitzuak 3,5 kide baino ez ditu behar txosten teknikoen arabera”.
Segurtasuna gizarteak zein udalak duten erronka handienetako bat dela esan du azkenik, “alkatetza nork eskuratzen duen alde batera utzita, eta uste osoa dugu bide honetatik lortuko dugula herritarrek askatasun osoz gozatu ahal izatea herriko kale guzti-guztietan”.