"Etorkizuneko Lezo" marraztuko dute larunbatean
Lezo Errotik-ek lan saioa antolatu du, parte-hartze prozesuan zehar adostutakoari forma emateko
Bigarren saioko irudia.Parte hartzeari buruz aritu ziren. Lezo Errotik-ek lan saio bat antolatu du larunbaterako Lezoko Ikastolan. Asmoa, orain arte egin duten lanari forma ematea, etorkizuneko Lezo zer nolakoa nahi duten finkatuz eta norabideak erabakiz.
Antolatzaileek iragarri dutenez, lan saioa 10:00etan hasiko da eta 13:30ak arte luzatuko da gehienez ere.
Aurkezpen motz bat egingo dute lehenik lan saioan, berehala lantaldeetan biltzeko, gogoratu dutenez, lehen batzarrean finkatu zituzten bederatzi erronkak ardatz: Etxebizitza, parte-hartzea, mugikortasuna, ongizatea, ingurumena, sozio-ekonomia, hezkuntza, feminismoa eta euskara.
Herri batzar batekin abiatu zen Lezo Errotik prozesua, eta galdetegi bat ere zabaldu zuten herritarren artean, beti ere “Lezok etorkizunean dituen erronkak identifikatu” nahian. Handik ondorioztatu zituzten orain lanerako darabilten bederatzi erronkak. Lehen batzarrean 50 lagun bildu ziren eta 97 lagunek erantzun zuten galdetegia. Prozesuaren lehen fasea izan zen.
Ondoren, parte-hartze prozesuaren bigarren fasean, zortzi hitzaldi antolatu zituzten, beste tokietako esperientzietara gerturatu nahian eta “politika egiteko modu berrietan” sakonduz.
Larunbateko saioarekin prozesuaren hirugarren faseari ekingo diote. Orain arteko lan guztia biribildu nahi dute, eta “erronka bakoitzari aurre egiteko Lezorako neurri egokienak zeintzuk diren erabakitzen hasi”. “Hemendik 10-15 urtera nolako Lezo nahi dugun eta amestutako Lezo hori lortzeko zer lan egin beharko ditugun adostu behar dugu”, adierazi dute.
Lezoarrei parte hartzeko deia egin diete: “Etorkizunerako zita honek duen garrantzia kontuan hartuta Lezo Errotik parte-hartze prozesuko talde eragileko kideok lezoarrei dei berezia egin nahi dizuegu urtarrilaren 19an, 10:00etan, Lezoko Ikastolan egingo den batzarrean parte hartu dezazuen”.
