Bulkada Asteburua antolatu dute Pasai Antxon
Jarrairen sorreraren 40. urteurrena dela eta, Ernai eta Aitzina gazte antolakundeek martxan jarri duten 'Bulkada berrien garaia da' dinamikaren barruan kokatutako ekitaldiak dira.
Jarrai gazte antolakundearen 40. urteurrenaren harira, gazte mugimenduaren bilakaeraren gaineko hausnarketa saioak antolatzen ari dira herrietan. Pasaia Antxon gazte eta ez hain gazteak hasiak dira bulkada berrien bila, eta horien arrastoan aritu bitartean, otsaileko lehen astebururako ondu duten egitaraua plazaratu dute. “Bulkada Asteburua” izango da Pasai Antxokoa, Urtarrilak 31n hasi eta otsailaren 2ra artekoa.
40 urteotako Antxoko gazte memoria bildu nahi duen erakusketarekin emango diote hasiera asteburuari. Pegatinak, kartelak, argazkiak, prentsa artikuluak… askotariko elementuekin osatuko dute mostra, Basari elkartean. Asteburu osoan zehar egongo da erakusketa bisitatzeko aukera.
Horrez gain, otsailaren 1ean, ostirala, gazte mugimenduan ibilitako kideekin solasaldi-afaria antolatu dute.
Eta larunbaterako, azken traka. Azken hamarkadetan gazte antolakuntzaren bilakaeran geldialditxoa egin, atzera begira jarri, hausnartu eta egindakoaren perspektibaz etorkizunera begira jarri ondoren, nola ez, festa. Otsailaren 2an izango da Bulkada Eguna, larunbatarekin. Lehenik, zumardian gazte belaunaldien arteko desafioa izango da, eta ondoren karropoteoa. Afaria ere antolatu dute, eta txartelak salgai daude jada, 10 euroan, Mimos eta Leunda tabernetan.
Egitaraua:
Urtarrilak 31
18:30: “40 urtetako Antxoko gazte memoria” erakusketaren irekiera Basarin. Ordutegia: Ostegun eta ostiralean 18:30etik 21:30era eta larunbatean 12:30etik 14:30era.
Otsailak 1
19:30: solasaldia-afari merienda Basarin Gazte mugimenduan ibilitako kideekin.
Otsailak 2, Bulkada Eguna
18:30: Belaunaldien arteko desafioa Zumardian. Ondoren, karropoteoa.
21:30: Afaria Basarin+parrada DJ Gantxegirekin Mimosen.
Txartelak: Mimos eta Leunda 15 euroan soldata dutenetzat, 10 euroan langabe eta ikasleentzat.
Aukera beganoa nahi dutenez, aurrez eskatu behar dute.
