Hezkuntza astea antolatu du Orereta Ikastolak
Hilaren 23tik 31ra guraso eta haurrentzat hainbat ekintza antolatu ditu horren harira, eta saio guztiak irekiak izango direla jakinarazi du.
Orereta Ikastolak ate irekien jardunaldia egingo du Linoko egoitzan. Argazkia: Orereta Ikastola Orereta Ikastolak Hezkuntza Astea antolatu du lehenengoz. Hilaren 23tik 31ra guraso eta haurrentzat hainbat ekintza antolatu ditu horren harira, eta saio guztiak irekiak izango direla jakinarazi du. Ate irekien bi saiorekin hasiko dute astea, hilaren 23an euskaraz egingo dute, eta 24an gazteleraz. Biak 18:00etan egingo dituzte. Hilaren 26rako, berriz, Lur Korta ipuin kontalariaren emanaldia antolatu dute, 2 eta 5 urte arteko haurrei begira, 17:15ean.
Hileko azken astean, berriz, hitzaldien tartea izango da: hilaren 28an eskola jazarpenaren gainekoa izango da 18:30ean hasita, elebitan,a din guzteitako haurren gurasoentzat; 29an teknologia digitalen aukerei eta arriskuei buruzkoa, 18:00etan LH5 eta DBH 2. maila arteko gurasoentzat; eta hilaren 31n, Derrigorrezko Bigarren Hezkuntzari zuzendutako orientazio saioa, 18:00etan hasita, DBH 4. mailako guraso eta ikasleei begira.
HHko Esmalteriako eraikina berritu
Haur Hezkuntzako Esmalteriako eraikina erabat berrituko duela, jakinarazi du ikastolak, datorren ikasturterako: “Haurrak bere biiztako lehenengo sei urteetan du garapen ahalmen handiena. Lehen urteak dira garrantzitsuenak haurraren hezkuntzan. Zimendu sendoak eraiki behar dira gerora horren gainean altxatu ahal izateko, aurrera egiteko. Horri erantzuten dion hezkuntza proiektua eraikitzen dabil Orereta Ikastola”. Horretarako, ikasleen beharretatik, nahietatik, gustuetatik, jakin minetik, erritmotik abiatuta egiten dutela lan esan du.
Lan egiteko modua zuzenean ikusteko aukera izan dezaten, Haur Hezkuntzako ikasgelen simulazioak egingo dituzte hilaren 23 eta 24an Linon, ate irekien saioak egiten dituzten bitartean.
Hezkuntza asteko saio eta ekintza guztiak ikastolaren Lino eraikinean (santa Klara kalea, 7) izango dira. Informazio gehiago webgunean izango da eskura.
