Kirol Galan, Batelerei aitortza
Pasaia Kayak, Trintxer Mendi Taldea eta Trintxerpeko Klub Atletikoa omendu dituzte
Batelerak, aurten, Kontxako bandera irabazteagatik Donibanen egin zieten harreran. San Juan Koxtapek eta bereziki Batelerak aitortza berezia jaso zuten atzo Donibanen egin zen Kirol Galan. Emakumeen kirol federatuan erreferente izan eta dena irabazi izanagatik zoriondu zituzten.
Haiekin batera, herriko beste hainbat kirol talde omendu zituzten. Batetik, Pasaia Kayak eta Trintxer Mendi Taldea, 30. eta 25. urteurrenak bete berri dituztelako hurrenez hurren, eta bestetik, Trintxerpe Atletiko Kluba, bere ibilbideagatik, eta barrutiko dinamizazioan egiten duen funtsezko lanarengatik. Aurten 40. urte beteko ditu Trintxerpeko Atletiko Klubak.
2018. urtean lorpen garrantzitsuak erdietsi dituzten kirolari pasaitarrei egindako elkarrizketak ikusteko aukera ere izan zen Kirol Galan, tartean, Urko Otegi saskibaloi jokalariarena, Lorea Etxabe judoka sanjuandarra eta Unai Martin esgrimaren modalitatean.
Jarduera Fisikoa eta eta Kirolerako aholkularitza zerbitzuaren berri emanez eman zioten hasiera kirol galari, eta ondoren adineko pertsonekin esparru honetan egiten ari den lana azaldu zuten, besteak beste, Tipi-Tapako irteerak edota bizikletan ibiltzen ikasteko tailerrak aipatuz.
Udan egin zen kirol eskaintzari buruzko ikus-entzunezko bat ere proiektatu zuten, iazko kanpaina 3 eta 16 urte bitarteko 560 partaide izan direla goraipatuz.
Galari Izaskun Gomez alkateak eman zion bukaera kirol klubek herriari egiten dioten ekarpena nabarmenduz.
