Aniztasunari kantuan
Errenteriaren aniztasuna balioetsi eta herri abegitsua dela adierazteko errodatu duten 'Egin zaidazu bisita' bideoklipa aurkeztu dute gaur.
Errenteriako Udalak Egin zaidazu bisita abestiaren bideoklipa aurkeztu du gaur goizean Niessen kulturgunean. Bideoklipak, “Errenteriak duen aniztasuna balioestea, elkarbizitzaren mezua zabaltzea eta Errenteria herri abegitsua dela adieraztea” bilatzen duela adierazi du udalak.
Abestia haibat hizkuntzetan grabatua dago. Leire Martinez (La Oreja de Van Gogh), Jonatan Camacho eta David Escudero (Sonakay), Mikel Markez, Lynda Chinedu Phillips, Asmae Barrouz eta Jon Santos abeslariek kantatu dute, herriko Zaria, Andramari eta Landarbaso abesbatzekin batera. Bideoklipean herriko jende eta eragile desberdinetako kideek hartu dute parte. Orotara, jatorri, adin, auzo nahiz lanbide askotako hogeita hamar errenteriarrek baino gehiagok lan egin dute proiektua aurrera ateratzeko, eta Errenteria-Oreretako hainbat lokalizazio erabili dituzte errodajerako.
Dejabu antzerki taldeko Ainara Gurrutxagak aurkeztu du aurkezpen ekitaldia. Aurretik, gonbidatuak sartzen ziren bitartean, Kamelanos Adiquerar elkarteko bi kidek artoa girotu dute kaxoi flamenkoa joz.
Autobusetan isla
Gaurko aurkezpenaren ondotik, abestiaren mezua zabaltzeko komunikazio kanpaina abiatuko du udalak. Hain zuzen ere, herriko hemezortzi autobus geltokitan iragarkiak jarriko dituzte, bideoklipeko protagonisten aurpegiekin.