Bulkada berrien garaia aurkeztu dute Errenteria-Oreretan
Ernai gazte antolakundeak 'Bulkada berrien garaia da!' dinamika aurkeztu du gaur Errenteria-Oreretako Foru plazan. 40 urte bete ditu gazte mugimenduak.
Ernai gazte antolakundeak Bulkada berrien garaia da! dinamika aurkeztu du gaur Errenteria-Oreretako Foru plazan. Herriko gazteek Euskal Herri sozialista eta feminista lortzeko borrokarako prestutasuna agertu dute, eta deia luzatu diete oreretarrei, udaberria aldera egingo diren ekintzak antolatze laguntzeko.
Aurten 40 urte beteko dira aurten Jarrai erakundea sortu zenetik. Hori horrela, gazte mugimenduaren urteurrena gogoratzen duen mural bat margotu dute askoren artean aurkezpenaren aurretik. “Hemen elkartu gara gazte antolakundearen sorreratik egindako lana aitortu eta bulkada berriak gurera ekartzeko asmoz”, adierazi dute ekitaldiaren amaieran eskaini duten prentsaurrekoan. Lau hamarkadako borrokaren barruan, herriko hiru gazte izan dituzte gogoan, “borrokan dena eman zuten Egoitz Gurrutxaga eta Ibon Zabala”, eta Algeciraseko Botafuegos espetxean dagoen Eider Perez.
Dozenaka lagun batu dira gazteek eginiko deialdiari begira, asko dagoeneko gazteak ez direnak. Hala, belaunaldien arteko zubiak aipatu dituzte prentsaurrekoa eman duten bi gazteek: “40 urte hauen oraina gara gaurkoan hemen bildu garen guztiok, gazte borrokan ibilitako belaunaldi ezberdinak, eta elkarren arteko zubiak eraikiz, gazte belaunaldi berriei antolakuntza eta borroka esparruetara batzeko deia luzatu asmoz elkartu gara”.
Iragana, oraina eta etorkizuna lotuz bukatu dute gaurko agerraldia, konpromisorako aldarria eginez: “Bizirik gaude, gazte eta errebelde. Euskal Herri sozialista eta feminista lortu arteko konpromisoan berresten gara gaur hemen, hemen batutako lagunok konpromisoa orainean baitugu. Herriak bultzada behar duelako bultzada, bulkada berriak behar dituelako”.
Udaberriari begira
Gaur aurreratu dutenez, udaberrian hainbat ekintza antolatuko dituzte Bulkada berrien garaia da! dinamikaren barruan. Lehena, erakusketa bat, martxoaren 14tik 22ra bisitatzeko aukera izango dena. Gazte mugimenduaren 40 urteak laburbiltzeko balioko duen erakusketa izango da eta belaunaldien arteko testigantzak batuko dituen hitzaldi batek abiatuko du.
Hil horretarako ere, 30erako, egun osoko jardunaldia antolatuko dute. “Herriko bulkada eguna ospatuko dugu”, adierazi dute Foru plazan. Martxoan banatuko dituzte egun horretarako txartelak, ohiko lekuetan (Arkaitza, Landare eta Sindikato tabernetan).
Bukatzeko, apirilaren 19tik 22ra Lemoan egingo den topagunerako deialdia luzatu dute Oreretako gazteek.