Lezon, adierazteko askatasun eske
Herriko hainbat elkarte eta kolektiboetako ordezkariak elkarretaratu dira plazan, Lezoko Udalaren "zentsura politika" salatu eta adierazpen askatasuna aldarrikatzeko.
Piztu Lezo, Sorginak, Txerrimuño gune autogestionatua, preso eta iheslarien aldeko taldea, Lezoko Badian Bizi! eta Oarso Bidasoko LABek deituta, adierazpen askatasunaren aldeko elkarretaratzea egin dute gaur arratsaldean Lezoko plazan. Udalaren “zentsura politika” salatu dute, herri mugimenduen kartel eta pankarta guztiak kentzen dituztela zehaztuz. Jarduteko modu hori, gainera, azken hilabeteetan areagotu dela gaineratu dute.
Deitzaileen hitzetan, beste garai batzuetara itzultzea ekarri du udalaren jarrerak: “Udalak hartu duen jarrerak lehengo denboretara itzultzera garamatza, hain zuzen paretak mutuak eta grisak ziren frankismoaren garaietara, oraingoan demokrazia ustel baten izenean. Halaber, herri mugimenduen “aldarriak zabaltzeko kaleak erabiltzearen beharra” azpimarratu dute: “Ez litzateke kartel, pankarta eta pintaketarik azalduko emakumeak behin eta berriz erailak izango ez balira, langileak euren lanpostuetan hilko ez balira, presoak kalean egongo balira, gure airea kutsatuta egongo ez balitz, etorkinei mugak itxiko ez balitzaizkie…”
Kontzentrazioan parte hartu dutenek azaldu dutenez, udalak kontratatutako Zerbitzu enpresako hainbat langilek arazoak izan dituzte kartelak kentzeari uko egin diotelako. Hala, langile horiekiko elkartasuna adierazteko ere baliatu dute gaurko elkarretaratzea.