Beraungo kirol gunea berritzeko hitzarmena sinatu dute udalak eta aldundiak
Gaur sinatu dute hitzarmena udalak eta aldundiak. Mikel Odriozola atletismo estadioa eta Beraungo futbol zelaia osatzen duten kirol gunea berrituko du udalak. Harmailak eta atletismo pistaren zati bat estaliko dira, baita zelaiko sarrera ere, eta belar artifiziala berrituko dute. Futbol 11ko zelaia mendebalderantz mugituko dute, eta futbol 5eko zelai berri bat atondu. Ureztatze instalazioa, kirol ekipamendua, eta baloiak gelditzeko sare hesiak hobetuko dituzte azkenik.
Guztira, 1.512.103 euroko inbertsioa egingo du udalak kirol gunea berritzeko, eta horietatik 480.000 euro Gipuzkoako Foru aldundiak jarriko ditu; hau da, lanen kostu osoaren %32a. Gaur goizean sinatu dute hitzarmena Julen Mendoza alkateak eta Denis Itxaso Kirol diputatuak, eta haren gaineko xehetasunak eman dituzte.
Proiektuaren helburua bereziki harmailen estalpea bi alboetara zabaltzea dela azaldu du Mendozak, “horrek onurak ekarriko dizkio kirol guneko beste eremuei, besteak beste, ura sartzen zelako gimnasiora eta tabernara euria egiten zuenean. Estadio kanpoan, gainera, beste estalpe bat jarriko da gurasoak zain izaten direnean ez bustitzeko. Futbol zelaia mugituko da beste zelai txikiago bat egiteko eta atletismo pista hobetu egingo da. Estadioaren alde batean estalpe bat jarriko da aldi berean, atletek bertan entrenatzeko aukera izan dezaten euria egiten duenetan. Azken hori atletismo taldeak egindako eskaera da”.
Kirolaren gaia udalarentzat garrantzitsua dela esan du Mendozak, “kirola klabea da pertsonen garapenerako, baina ez hori bakarrik, kohesio sozialerako elementu oso garrantzitsu bihurtu da”. Eskerrak eman dizkio aldundiari eta Itxasori, “diru laguntza hauek garrantzitsuak direlako instalazioetan hobekuntzak egin ahal izateko”.
Udalek egiten duten ahalegina eskertu du Itxasok bere aldetik, “badakigu kirol ekipamenduak mantentzea kostu handiko atala izaten dela, kirol ekipamenduak garestiak dira mantentzen are gehiago zabaldu edo berritu nahi baditugu. Errenteriak, historikoki, Gipuzkoako hirugarren herria izanik, paper garrantzitsua jokatu izan du kirol instalazioetan. Udalari eskerrak eman nahi dizkiogu, beraz, bere lehentasunen artean kirol ekipamenduak berritzearen aldeko apustua egiteagatik”.
Diru laguntza testuinguru jakin batean emango duela aldundiak zehaztu du, bestalde, “2017an kirol ekipamenduen plan bat onartu genuen. 2020. urtera arte, 10,6 miloi euro bideratuko ditugu, udalek bideratuko dituzten diru zatiekin 53,8 miloi euro izango dira, 55 udalerri izango dira onuradun, eta 567.000 biztanleri eragingo diete egiten ari diren eta egingo diren lanek”.
Lan horiek egiteko bi urteko epea izango du udalak, beraz, hitzarmenean sinatutakoaren arabera, 2020ko abenduaren 31rako amaituta beharko dute lanak. Aldundiaren laguntza ere zatituta jasoko du udalak, 220.000 euro 2019an; eta 260.000 euro 2020an.
