[Bideoa] Lehen eskutik zabaldu dute euskal presoen errealitatea
Gu!azen dinamika egin zuten larunbatean Gaztañoko auzotarrek. Helburua, euskal presoek bizi duten egoera zabaltzea.
Lehen eskutik zabaldu dute euskal presoen errealitatea Gu!azen dinamika egin zuten larunbatean Gaztañoko auzotarrek. Helburua, euskal presoek bizi duten egoera zabaltzea, mahai gainean jartzea, eta horretarako jaia eta aldarrikapena uztartu zituzten larunbatean. Aitzol Gogorza, Mikel Arrieta eta Eider Perez euskal presoak auzokideak dituzte. Lehenengo biak, larri gaixo daude; Perez eta bikotekidea espetxean daude, eta semea dute, motxiladun haurra da.
Goizetik postalak idatzi eta murala egin zuten. Eguerdi partean berriz, auzo basoan hiru gaztainondo landatu zituzten, Perez, Arrieta eta Gogorzaren amek auzotarrek babestuta.
Arratsaldean haurren jolasak heldu ziren. Baita solasaldia ere. Zortzi preso ohik beren esperientzia kontatu zuten eta bildutakoen jakin mina ase eta galderak erantzun zituzten. Atxiloketa unea, komisariatik pasatzea, espetxea, isolamendua, bidaiak, espetxean ama izatea, aske irteteko uneak… Zehaztasunez eta bakoitzak beretik kontatu zituzten. Oier Gomez izan zuten gogoan. 2017an eten zioten espetxe zigorra Frantziako Estatuan eta larunbatean zendu zen preso ohia gaixotasun larri baten ondorioz. Gogorza eta Arrietaren egoerari ere erreparatu zioten: “espetxea gogorra bada, gaixorik egonik are gogorragoa da. Egoera zaila da benetan”.
Gaixorik dauden presoak etxean behar dutela berandu baino lehen esan zuten, “denak ekarri behar ditugu, baina larri gaixo dauden presoen egoera lehentasuna da”. Lanean jarraitzera deitu zuten gainera, euskal presoen eskubideen alde egitera, “halako solasaldiak, eta antzeko espazioak antolatzea garrantzitsua da egoera gizarteratzeko”.
Bertso afariarekin amaitu zuten larunbateko ekintza sorta. Unai Muñoa eta Ander Lizarralde bertsolariek girotu zuten azken txanpa.
Antolatzaileak pozik azaldu dira erantzunarekin, eta batez ere eskerrak eman dizkiete bizilagunei solasaldirako zein bertso afarirako jatekoak haien kontura izan baitziren. Ondokoa, Gu!azen dinamikak goizeko ekintzekin egindako bideoa da.
