Gobernu taldeak agintaldiaz egindako balantzea "osatugabea" dela esan du PSE-EEk
Balantze horretan ez diola gobernu taldeak autokritikari tarterik utzi, eta kudeatu ez dituen hainbat kontu bereganatu dituela leporatu dio alderdi sozialistak.
PSE-EEko ordezkariak atzoko plenoan “Osatugabea” eta “faltsukeriekin” egin duela agintaldiaren gaineko balantzea gobernu taldeak esan du PSE-EEk. Balantze horretan ez diola gobernu taldeak autokritikari tarterik utzi, eta kudeatu ez dituen hainbat kontu bereganatu dituela leporatu dio alderdi sozialistak. Agintaldi honetan martxan jarri diren azpiegitura garrantzitsuenak Gipuzkoako Foru Aldundiaren Mugikortasun sailaren %85eko finantziazioarekin egin direla ez duela aipatu gobernu taldeak balorazio horretan salatu du PSE-EEk: “Alaberga eta Galtzarabordako igogailuen kasua da. Harrigarria da, bestalde, Lekuonaren kudeaketarekin pozik azaltzea. Izan ere zortzi urte pasa dira eta oraindik ez da martxan, diru gehiago suposatuko du, arrazoia eman digute eta azkenean liburutegia jarriko dute”.
Aparkalekuez ere mintzatu da alderdi sozialista. Gobernu taldeak ez omen du bete alor horretan ere: “Konponbidea emango zutela agindu zuten Olibet eta Pontikan aparkalekuak eginda”. Eraikitzen ari diren gazteentzako zuzkidurako 51 etxebizitzen gainean aritu da, bestalde, “bere egin du proiektu hori gobernu taldeak, 2008az geroztik geldirik zegoen akordio bat berrartu zuena alderdi sozialista izan zenean. Gazteentzako alokairua ordaintzeko laguntzen proposamena ere PSE-EErena izan zen, eta duela bi urte proposatu genuenean ez zuten babestu”.
Langileekin gatazka sortzea leporatu dio azkenik gobernu taldeari, “TAO eta garabi zerbitzuko langileak kaleratu, egoera larria eragin zien langile eta haien familiei, eta 800.000 eurotik gora ordaindu behar izan ditu indemnizazioetan. Lan gatazka du gainera, Errenteria Musikal eta Udaltzaingoarekin. Agintaldi honetako kudeaketak ez die erantzun Errenteriak zituen arazo larrienei: trafikoa, aparkalekua, segurtasuna, etxebizitza soziala, garbiketa, eta hiri mantenua. Aldebakarreko erabakiak hartu ditu gobernu taldeak, kontsentsu eta akordioak bilatu gabe”.”
