Istripua izan dute Jesus Mari Etxeberriaren senideek
Puerto III (Andaluzia, Espainia) espetxean dago Etxeberria, Euskal Herritik 1050 kilometrora, eta haren anaiak eta lagun batek Sevillan izan zuten istripua ostiralean.
Dispertsioa salatzen duen pankarta bat Jesus Mari Etxeberria Goierri Oreretako euskal presoaren senideek istripua izan dute espetxera bidean. Puerto III (Andaluzia, Espainia) espetxean dago Etxeberria, Euskal Herritik 1050 kilometrora, eta haren anaiak eta lagun batek Sevillan izan zuten istripua ostiralean. Sevillara iristeko 50 kilometro falta zitzaizkienean izan zuten istripua 20:00etan, aurretik istripua izan eta errepidean geldirik zegoen auto baten kontra jo zutenean Etxeratek, euskal preso eta iheslarien senide eta lagunen elkarteak jakinarazi duenez.
Anaia zein laguna onik atera ziren istriputik baina une arriskutsuak bizi behar izan zituztela istripua izan ondoren zehaztu du Etxeratek, “autoa bultzaka atera behar izan zuten errepide erditik, autobidean zegoen trafiko handiari aurre eginez”. Bidaiarekin jarraitzeko aukera izan zuten, eta hurrengo egunean zuten bisitara heldu ziren.
Etxeberriaren senideek izan duten istripuak sakabanaketa politikak hasi berria den urtean eragin duen bigarrena da. Etxeratek elkarretaratzera deitu du Hego Euskal Herriko lau hiriburuetan azken istripu hori salatzeko eta sakabanaketa bertan behera uzteko exijitzeko. Iruñean gaur izango da elkarretaratzea 20:00etan Gobernu zibilaren aurrean, Bilbon bihar 19:30ean Arriaga plazan; Gasteizen hilaren 30ean 19:00etan Andra Mari Zuria plazan; Donostia ere, asteazkenean egingo dute 19:00etan Bulebarrean, udaletxe ondoan.
Ez da Etxeberriaren senideek duten lehen istripua. 2014. urtean, euskal presoaren hiru lagunek auto istripua izan zuten Puerto III espetxerako bidean. Kamioi batek karga galdu, gasolio tankea urratu eta, atzeko hiru kotxeek talka egin zuten, tartean Etxeberriaren lagunenak.
