Lezoko derbia, bihar gauean
Bihar, bi taldeak etxekoak izango dira. Gipuzkoako Lehen Mailan dauden Lezoko bi areto futbol taldeek herriko derbia jokatuko dute bihar (ostirala) 21:50an hasita Bekoerrota kiroldegian. Liga horretako 15. jardunaldiko partida da, bigarren itzuliko bigarrena. Jaixki AFT-Gaintxu AFT bihar kantxan. Ikuskizuna eta emozioa ziurtatuta daude.
Bigarren jardunaldian neurtu zituzten indarrak lehen aldiz historian Gipuzkoako Lehen Mailan bi taldeek. Orduko hartan Gaintxuk jokatu zuen etxeko bezala, Jaixki izan zen ‘kanpokoa’. Azken horiek irabazi zuten, 2-4.
Ligan, goian dago Jaixki, bigarren postuan. Aurreko jardunaldian galdu egin zuelako ez da lider bezala iritsi derbira. Gaintxuk, berriz, lehen urtea du maila horretan, eta apurka beheko postuetatik ateratzen ari da, adibidez, aurreko asteburuan 3-1 irabazi ziolako Eskoriatzari Lezon.
Ostiral gaua izanda, Jaixkik taberna zerbitzua eskainiko du. Ez da ezer faltako, beraz, derbi koloretsuari aurre egiteko.
