[Emaitzekin] Areto futboleko derbia 'etxekoentzat', eta sorpresa bat
Jaixki AFTk 4-2 irabazi zion Lezoko areto futboleko derbian Gaintxu AFTri. Eskubaloian, Munttarperen gizonen taldearen ezusteko porrota.
Jendez bete ziren Bekoerrotako harmailak areto futboleko derbia ikusteko. Argazkia: Jaixki AFT Lezoko kirol taldeen asteburuko kartelerako izarra areto futboleko herriko taldeen arteko derbia izan zen. Ostiralean, Bekoerrotan eta giro ederrean jokatu zen partida, azkenean Jaixki AFTk 4-2 irabazi ziolarik Gaintxu AFTri. Etxeko talde zen Jaixki ostiralean, eta partida hasi aurretiko pronostikoak bete egin zirela esan daiteke, lidergoaren borrokan ari direlako Jaixkikoak, eta Gaintxu mailari eusteko bidean ari delako, ondo gainera. Nabarmentzekoa da kiroldegian izan zen giroa, ikusle askorekin.
Sorpresa bat ere izan da asteburuan. Ez ona. Munttarpe Eskubaloi Taldeko gizonen taldeak 27-28 galdu zuen etxean sailkapenean azkena zen Ormaiztegiren kontra. Ezusteko porrota. Lider baita Gipuzkoako Lehen Mailan Munttarpe, eta nahiz eta galdu, lider jarraitzen du, bigarren den Eibarko Haritza taldeak ere galdu egin zuelako asteburuko norgehiagoka. Eskerrak. Bestalde, emakumeen taldeak 18-14 hartu zuen mendean Ordizia.
Futbolean, Allerruren gizonen talde nagusiaren ezinbesteko garaipena sailkapenaren zuloan dagoen Añorgaren etxean, arnas gehiago hartzen joateko. Izan ere, garaipen honekin 14. jarri da Allerru Erregional Ohorezko Mailako sailkapenean, 21 punturekin: hau da, jada lau talde ditu atzetik, eta 11. postua hiru puntura dute bakarrik. Emakumeen Allerruk 0-2 irabazi zuen Trintxerpen.
Saskibaloian, 72-71 galdu zuen Kurkubik BKLren kantxan. Gipuzkoako Hirugarren Mailako sailkapenaren goialdean egoteko atzera urratsa.
Jarraian, asteburuko emaitzen zerrenda:
FUTBOLA
Gizonen Erregional Ohorezko Maila
- Añorga-Allerru 1-2
Emakumeen Gorengo Maila
- Trintxerpe-Allerru 0-2
Gizonen Gazteen Ohorezko Maila
- Trintxerpe-Allerru partida bertan behera gelditu zen, epailea ez zelako agertu.
Gizonen Gazteen Lehen Maila, Kopa
- Allerru-Orereta Kafea 4-1
ESKUBALOIA
Gizonen Gipuzkoako Lehen Maila
- Munttarpe-Ormaiztegi 27-28
Emakumeen Gipuzkoako Liga
- Munttarpe-Ordizia 18-14
ARETO FUTBOLA
Gizonen Gipuzkoako Lehen Maila
- Jaixki AFT-Gaintxu AFT 4-2
SASKIBALOIA
Gizonen Gipuzkoako Hirugarren Maila
- BKL-Kurkubi SBK 72-71
