Karlistaldira itzulera
Jose Antonio Recondo Bravo idazleak bere azken liburu aurkeztu eta Errenteria gerran eta gerra aurrean (1868-1876) hitzaldia emango du astelehenean.
Recondo liburua eskutan eta Etxeberriarekin. Argazkia: Medikuen ahotsa La guerra carlista en Gipuzkoa. Tolosa y San Sebastian: dos modelos contrapuestos 1872-1876 liburua aurkeztuko du Antonio Recondo Bravo sendagile eta idazle tolosarrak astelehenean Niessen Kulturgunean. Besteak beste, Tolosako Andia elkarteko lehen presidentea da, baita Aranzadi Zientzia Elkarteko Antropologia saileko kidea, eta gai historikoez mintzo diren bost libururen egilea.
Azken liburua aurkeztuko du eta horrekin batera hitzaldia emango du astelehenean: Errenteria gerra eta gerra aurreko garaian(1868-1876). Paco Etxeberria forentseak aurkeztuko du hitzaldia, eta Errenteriako La Ilusion elkarteak ere hartuko du parte. 1873ko abuztura atzera egingo du Recondok hitzaldian, guda hasi eta zortzi hilabetera, eraso egin eta Euskal Herriaren jabe egin zirela karlistak kontatuko du. Gipuzkoa mendebaldeko herri guztiak menpe hartzen joan ziren, Eibar, Arrasate, Bergara eta Azpeitia bezalako herri garrantzitsuak barne. 1874ko otsaila amaieran amaitu zuten erasoa, Tolosa ere hartuta. Azken hori, biztanle gehien zituen Gipuzkoako bigarren herria zen, foru aldundia bertan zen. Oria bailara, eta Oiartzun ere menpe hartu zituzten karlistek.
Gainontzeko herri liberalen gisa, mehatxu karlista sufritu zuela Errenteriak dio tolosarak. “1870. urtean 3.200 biztanle zituen Errenteriak. Armada ezarri zuten bertan, eta horrek arazoak eragin zituen herritarrekin. Errenteria base logistikoa zuten eta Oiartzungo zein Bidasoako bailaratan jarduten zuen armadarentzat kuartela zen. Udalak gastu handiei eginbehar izan zien aurre tropa hornitzeko; etxe batzuk soldaduak hartzeko erabili zituzten jabeak kanporatuta; etxebizitza batzuk suntsitu zituzten materialak gotorlekuak eraikitzeko erabiltzeko; Zumardian eta Galtzarabordan ziren zuhaitzak moztu zituzten egurra kuarteletan erregai gisa erabiltzeko…”
1874ko azaroaren 10 eta 11n armadak egindako operazioetan, armadaren zutabeen abangoardia osatzen zuten mikeleteek Oiartzun eta Bidasoa eskualdeetako 300 baserriri su eman zietela dio Recondok, horietatik 33 Errenteriakoak omen ziren.
Horretaz guztiaz mintzatuko da tolosarra astelehenean emango duen hitzaldian. Niessen Kulturgunean izango da 19:00etan.
