Zurrumurruak gezurtatu eta inauterietan desfilea egongo dela baietsi du Trintxerpeko Jai Batzordeak
Konpartsa gehienek uko egin diote parte hartzeari
Herriko kudadrilek desfilatuko dute larunbateko konpartsen desfilearen ondoren. Hautsak harrotu ditu Trintxerpen inauterietako desfilea beste era batean antolatu asmoz jai batzordeak adostutako araudi berriak, eta zabaldu diren zurrumurruak argitu asmoz komunikatu bat plazaratu du jaien antolaketaz arduratzen den taldeak.
Lehenik eta behin inauteriak ospatuko dituztela argitu dute, eta data ere zehaztu dute. Martxoaren 9an eta 10ean izango dira festak, eta ohi bezala konpartsen desfilea egongo dela berretsi dute.
Dirudienez, baina, “konpartsa gehienek” uko egin diote parte hartzeari, jai batzordearen erabakiarekin ados ez daudelako.
Azken urtetan 21 konpartsa desfilatu dira Trintxerpeko inauterietako larunbatean, eta txiki geratu da barrutia, segurtasun arazoak sortuz. Ibilbidea luzatzeko egindako saiakerek porrot egin dute, eta hori dela eta, aurten, konpartsen kopurua orekatu nahi izan dute, eta konpartsa denak larunbatean irten ordez, igandeko desfilea indartu. Erabakia, antza, ez da denen gustukoa izan. “Bilera desatsegin baten ondoren, konpartsek Trintxerpen ez ateratzearekin egiten dute mehatxu, ateratzeko baldintza bakarra 21ak larunbatean San Pedrotik ateratzea izanik”, kexu da Trintxerpeko jai batzordea.
Trintxerpeko inauterien gaineko erabaki guztiak jai batzordeak hartzen dituela ohartarazi dute bide batez, eta modu horretan, babesa agertu nahi izan diote Trintxerpeko alkateorde Lore Suarezi, “bere pertsonaren aurka egin diren lekuz kanpoko komentario guztien ondorioz”.
Azkenik, larunbateko konpartsen desfilearen ondoren kuadrillek aurten desfilatzeko aukera izango dutela iragarri dute.
“Egoera ulertzea espero dugu eta baita aurki programa eskuartean izatea ere”, adierazi du Jai Batzordeak.
