[Emaitzekin] Haizea alde izan dute zerbait jokoan dutenek
Allerruren eta Munttarperen gizonen taldeek balio handiko garaipenak lortu dituzte asteburuan. Jaixkik ere urrezko hiru puntu eskuratu ditu.
Jaixkik erraz irabazi zuen etxean. Sailkapen nagusietan puntu premia handiena zuten Lezoko kirol taldeek asteburu ona izan dute. Haizea alde. Allerruren gizonen talde nagusiak, Munttarperenak eta Jaixki AFTk asteburuko partidak irabazi egin dituzte, gozo-gozo jaso dituzten puntuak eskuratuz. Munttarpeko neskek, Gaintxu AFTk eta Kurkubik galdu egin dute, baina haien puntu premia ez da hainbestekoa.
Allerruk otsaileko partida guztiak irabazi ditu. Hirugarrena jarraian larunbatean irabazi zuen 0-1 Elgoibarren zelaian. Aurretik, hil honetan Añorgaren zelaian eta etxean Beti Gazteren kontra batu zituen puntuan hirunaka. Bederatzi puntu jarraian lortzearen ondorioak, asko eta onak: batetik, Erregional Ohorezko Mailako sailkapen nagusiko zonalde epelera hurbiltzen hasi dira lezoarrak, 12. jarriz 27 punturekin, jaitsierako postuak nahikoa urrun uzten hasiz; bestetik, sasoi bukaerari (12 partida falta dira) lasaiago aurre egiteko aukera izango du talde zuri-berdeak, hori bai, lokartu gabe. Hurrengo jardunaldian ia deus ere jokoan ez duen Mondragon (bederetzigarren dira, 33 punturekin) jasoko dute Plazetan: laugarren partida irabazteko, eta salbazioa eskura izateko hiru puntu oso baliotsu izan daitezke.
Munttarperen gizonek, estu, baina 26-25 irabazi zioten Elgoibarri larunbat arratsaldean. Azken boladan kosta egiten ari zaio Lezoko taldeari partidak aurrera ateratzea, eta horren erakusle larunbatekoa: azkena eta ia maila galtzear den Elgoibarrek estu hartu zuen Lezoko taldea. Baina oso baikor baloratu beharreko garaipena izan da. Izan ere, bigarren den Eibarrek galdu egin zuen asteburuan, beraz, are liderrago da Munttarpe bigarren den Eibar hiru puntuz atzean utzi duelako. Liga bukatzeko zazpi norgehiagoka falta dira. Igoeraren aukera eskura du Lezoko taldeak.
Areto futbolean, Jaixkiren garaipen erraza, 11-3, Legorretaren kontra. Hala, Gipuzkoako Lehen Mailako hirugarren dira lezoarrak, liderretik eta bigarren postuan dagoenetik (Euskalduna eta Orixe Tolosaldea hurrenez hurren) puntu bakarrera. Zortzi partida falta dira liga bukatzeko, eta oraindik goi-goian daude Jaixkikoak. Zergatik ez pentsatu igoeran?
Jarraian, talde nagusi guztien asteburuko emaitzak:
FUTBOLA
Gizonen Erregional Ohorezko Maila
- Elgoibar-Allerru 0-1
Emakumeen Gorengo Maila
- Atseden zuen Allerruk
Gizonen Gazteen Ohorezko Maila
- Allerru-Ekintza 1-2
Gazteen Gizonen Lehen Maila
- Allerru-Amara Berri 3-1
ESKUBALOIA
Gizonen Gipuzkoako Lehen Maila
- Munttarpe-Elgoibar 26-25
Emakumeen Gipuzkoako Liga
- Munttarpe-Leizaran 19-21
ARETO FUTBOLA
Gizonen Gipuzkoako Lehen Maila
- Jaixki AFT-Legorreta 11-3
- Oiartzun-Gaintxu AFT 11-2
SASKIBALOIA
Gizonen Gipuzkoako Hirugarren Maila
- Getariako Keta-Kurkubi SBK 65-33
